موقع د. محمود صبيح

منتدى موقع د. محمود صبيح

جميع الأوقات تستخدم GMT + ساعتين



إرسال موضوع جديد الرد على الموضوع  [ 4 مشاركة ] 
الكاتب رسالة
 عنوان المشاركة: منقول : بوست عامل ضجة .. الشاب الاسباني الذي سافر عبر الزمن
مشاركة غير مقروءةمرسل: الاثنين يوليو 19, 2021 8:10 am 
غير متصل

اشترك في: الخميس يونيو 10, 2021 2:44 pm
مشاركات: 19


شاب يصل 2027 ويعيش بالعالم بمفرده

حكاية خافيير الشاب الاسباني اللي قالب السوشيال ميديا في اسبانيا والعالم من شهر فبراير اللي فات لغاية النهارده

أيه بقى القصه

القصة غامضة جدا

بس ركز معايا دقايق

الموضوع قالب الدنيا بره وانا مش بحاول اقنعك انا بس بعرفك

مش معنى كده إني مقتنع أعتبرني بقولك خيال

الموضوع بكل سهوله

مستخدمي التيك توك في اسبانيا وتحديدا في شهر فبراير اللي فات صحيوا الصبح على اكونت اسباني اسمه Unico sobreviviente

او بالعربي "المنقذ أو الناجي الأخير "، اكونت ظهر فجأه لشخص بيقول انه اسمه "خافيير" ومنزل فيديو كاتب عليه بالاسباني انه مش عارف هو مين او فاقد الذاكرة، وانه صحي لقى نفسه في مستشفى في اسبانيا
بس مفيش ولا بني ادم في الدنيا حواليه كأن البشر اختفت، ومش كدة وبس، لا دا التاريخ بيقول انه في فبراير ٢٠٢٧ .

- غريبة ، بس دا فيديو واحد يعني!!

لا مهو الفيديو انتشر، وبدأ خافيير ينشر فيديوهات مختلفة من مواقع مختلفة كلها لاماكن معروفة في فالنسيا لكن مفيهاش ولا إنسان واحد بس يوحد ربنا،

مفيش غير عربيات مركونة، محلات مفتوحة، شوارع فاضية، وشكرا.

هتشك مثلا انه مصورها وقت الحظر!!

ممكن جدا انا كمان فكرت كده
، بس الغريب اوي بقا انه مبيصورش اي اماكن كدة وخلاص، دا بيصور الاماكن اللي الناس طلبتها منه في الكومنتات، والاغرب انه بيصورها في الوقت اللي يختاروه، يعني عايز الميدان الفلاني الساعة ٥ وربع العصر، يصورها في نفس الساعة، والمكان فاضي.

- طب ما يمكن صوّر الفيديوهات دي وقت الحظر؟

لا مهو ناس كتير توقعوا الحوار ده وبدأوا يدققوا في التفاصيل، بس المثير للريبة ان واحد من الفيديوهات دي كان انه راح يصور جوا المستشفى اللي ادعى انه صحي جواها، والغريبة انه صورها فاضية تماما، لا ممرضين ولا عيانين، هل وقت الحظر كان فيه مستشفيات فاضية ولا هل فيه في وقتنا ده مستشفى فاضية فعلا؟

- طب ما يمكن هو معدل التواريخ !!

بس الغريبة ان واحد من فيديوهاته، جاب اليكسا اللي هوا الذكاء الاصطناعي المساعد لأجهزة جوجل ومربوط بالشبكة العالمية

، وسألها عن تاريخ النهاردة، قالتله ان التاريخ ٢١ مارس ٢٠٢٧!!

- طب ما يمكن بيختار اماكن فاضية اصلا!

انا بردو شكيت في ده منا مش اسباني ومعرفش الاماكن، لكن هو بيختار الاماكن العامة اللي صعب تكون فاضية حتى لو في وقت حظر، زي الكاتدرائية، قصر Marqués de Dos Aguas في فالنسيا اللي تابع للمملكة الاسبانية وعليه حراسة، وزي المطار مثلا، متخيل انه مصور فيديو داخل المطار وهو فاضي لا فيه حرس ولا طيارات؟

- طب ما يمكن لاعب في الفيديوهات دي!!

يمكن بردو، بس الغريبة ان فيه فيديو من فيديوهاته كان بيصور واحد من ازحم الميادين في فالنسيا، الميدان ده حتى لو فيه حظر عالاقل هنشوف واحد ماشي ولا ظابط معدي، المدينة دي فيها ٢.٥ مليون ساكن معقول محدش هيفتح شباك؟

المهم الفيديو ده بيصور الميدان وبعدين بيصور مراية عاكسة، بيظهر هوا فيها لوحده، ازاي هيلعب في الفيديوهات ويسيب نفسه؟

- ممكن يكون بيصور الفجر والدنيا فاضية!

ممكن، بس فيه واحد اقترح ده في التعليقات، وما كان من خافيير الا انه نزل صور فيديو في ميدان هناك وهوا فاضي تماما، ووجه الكاميرا ناحية الساعة الرئيسية في الشارع، وكانت الساعة ٥:٤٦ العصر.

- يمكن الاماكن دي متفقة معاه؟

احتمال كبير، بس فيه اماكن هو صور فيها من الصعب انهم يتفقوا معاه حتى لو كان مين، زي مثلا انه مصور فيديو جوا قسم الشرطة، مفيش لا ظابط ولا مجرم، صعبة دي، وكمان صور جوا جنينة الحيوانات، الاقفاص كانت فاضية، فا انتا متخيل انهم هيحرروا الاسود والقرود عشان فيديو؟ صعبة شوية، بلاش، فيه فيديو مصوره جوا ستاد نادي فالنسيا

، ودخل ولعب في دواليب اللاعيبة كمان، نادي بحجم فالنسيا تفتكروا هيتفق معاه؟

- طب عايز تقولي انه مسافر عبر الزمن؟

لا صعبة، الاجهزة اللي بيصورها بتقول انه سنة ٢٠٢٧ بس كل حاجة تانية بتقول انه في ٢٠٢١ عادي، الغريبة هو اختفاء البشر في كل فيديوهاته

دي تفسيرها ايه؟ ممكن يكون في بعد زمني تاني مثلا او في وضع مغاير لزمنا ده؟ دا لو صحت الرواية يعني مش مجرد شوية لعب بالفوتوشوب والايديت ولا حاجة.

- بعد زمني تاني؟؟

بص، فيه فيديو ليه اتحدى متابعيه كلهم انه هيروح لاماكن معينة يحط فيها سلاسل وحاجات كدة ويخبيها، الاماكن دي زحمة دلوقتي فعلا، وصور الفيديوهات وهوا بيحط الحاجات دي والناس راحت عالاماكن دي عشان تدور عالحاجة، ولقوها، طب حطها ازاي وامتا والناس موجودة؟ محدش عارف.

- طب ما يمكن حاطتها من قبل كدة!!

يمكن، بص القصة دي انتشرت فعلا في اسبانيا، لدرجة ان فيه قناة محلية هناك اتحدته انه لو فعلا في بعد زمني تاني، فا هما هيخبوا كتاب في الاستوديو بتاعهم اللي مبيفضاش من الناس، وهوا كل ما عليه انه ييجي ياخد الكتاب ده، وفعلا هو صور فيديو وهوا بياخد الكتاب من المكان اللي سابوه فيه.

- طب وايه الرعب في كدة؟

المرعب ان القناة دي نشرت فيديو من كاميرات مراقبة الستوديو ده في الوقت اللي خافيير جه اخد الكتاب منه، واللي ظهر في الكاميرا، خيال، خيال غامق بيتحرك ناحية المكان بس، مجرد خيال.

على افتراض جدية القصة بالرغم من تفاهتها، لازم اقول كام نقطة مش منطقية في الكلام ده كله ..

اولا: ان كل حاجة هو مصورها نضيفة جدا، مفيش عربيات عليها تراب، مفيش هدوم واقعة عالارض، مفيش ورقة في الشارع، ولو فعلا كلامه حقيقي والبشر اختفوا كان التراب غطى كل حاجة والاكل باظ وهكذا.

ثانيا: مين بيشغل النت، والكهربا في الشوارع، واشارات المرور، وانوار المولات والاماكن السياحية؟

ثالثا: البحر فيه سفن ليه طالما مفيش ناس؟ والشاطيء فيه اثار اقدام ازاي؟ دا لو شوية رياح جت كام يوم بس الرملة هترجع فلات تاني، فا ازاي لسة فيه اثار اقدام؟

فا انتا قدام ٣ خيارات:

- يا تكون واقعي وتصدق انه بيصور الاماكن دي بإيديت بيشيل الناس او مثلا القناة المحلية اللي دخلت دي بتساعده بتقنياتها بحثا عن الشهرة او فيه app معين هو بيستخدمه والموضوع مجرد حب للظهور زي اي شاب نفسه يتشهر عالتيك توك "هو بالفعل مشهور وعنده ملايين المشاهدات حاليا واسمه جه في اكبر شبكات الاخبار".

- يا تكون خيالي وتقنع نفسك ان خافيير دخل فجوة زمنية او سافر بالزمن والبشر هيختفوا سنة ٢٠٢٧ فعلا او انه صحي في بُعد زمني تاني بس قادر يتواصل مع شبكات الانترنت بشكل ما، بُعد زمني فيه كل الموجودات اللي في عالمنا لكن مفيهوش حياة، زي مثلا الابعاد اللي بيعيش فيها الجن او الاشباح لو مؤمن بيهم، او لو شفت فيلم Doctor strange او مسلسل Dark هتفهم انا اقصد ايه.

- يا تضم عالفريق التالت اصحاب السلام النفسي، وتخش تدور على فيديوهاته عالتيك توك او يوتيوب وتستمتع من اجل الاستمتاع بكل ماهو غريب او كرييتف في العالم بكل بساطة ومتسألش كتير لحد ما حد يكشفه او هو يقرر يعترف انه كان بيحور في يوم من الايام ❤️

اسم الحساب على تيك توك لو حابب تدور بنفسك هو Unico sobreviviente ودور بنفس الاسم على جوجل او يوتيوب او بإسم the last survivor

لينك حساب التيك توك



أعلى
 يشاهد الملف الشخصي  
 
 عنوان المشاركة: Re: منقول : بوست عامل ضجة .. الشاب الاسباني الذي سافر عبر ال
مشاركة غير مقروءةمرسل: الجمعة يوليو 23, 2021 9:30 pm 
غير متصل
Site Admin

اشترك في: الاثنين فبراير 16, 2004 6:05 pm
مشاركات: 22013

إعلان عن مسلسل

وصفوا النقاد ما حدث بأنه أحسن دعاية وأقواها خلال العشر سنين السابقة ..

_________________
عَنْ عَلِيٍّ قَالَ كُنَّا إِذَا احْمَرَّ الْبَأْسُ وَلَقِيَ الْقَوْمُ الْقَوْمَ اتَّقَيْنَا بِرَسُولِ اللهِ صلى الله عليه وسلم فَمَا يَكُونُ مِنَّا أَحَدٌ أَدْنَى إِلَى الْعَدُوِّ مِنْهُ


أعلى
 يشاهد الملف الشخصي  
 
 عنوان المشاركة: Re: منقول : بوست عامل ضجة .. الشاب الاسباني الذي سافر عبر ال
مشاركة غير مقروءةمرسل: الجمعة يوليو 23, 2021 9:40 pm 
غير متصل

اشترك في: الخميس مارس 29, 2012 9:53 pm
مشاركات: 41160
من اين له الإنترنت لما فاق من الغيبوبة ؟؟؟

نوستراداموس اليهودى كان من اسبانيا وسافر الى المستقبل وعرف احداثا مستقبليه

بالنظر فى ماء الكوب !!!!!

طبعا توساراداموس لطش رباعياته التى كتبها من النبؤات الاسلاميه باسبانيا

سبحان الله

ماذا سيحدث سنه 2027 ؟؟؟

_________________
أستغفر الله العلى العظيم الذى لا اله الاّ هو الحى القيوم وأتوب اليه
أستغفر الله العلى العظيم الذى لا اله الاّ هو الحى القيوم وأتوب اليه
أستغفر الله العلى العظيم الذى لا اله الاّ هو الحى القيوم وأتوب اليه


أعلى
 يشاهد الملف الشخصي  
 
 عنوان المشاركة: Re: منقول : بوست عامل ضجة .. الشاب الاسباني الذي سافر عبر ال
مشاركة غير مقروءةمرسل: الجمعة أغسطس 06, 2021 7:06 pm 
غير متصل

اشترك في: الخميس يونيو 10, 2021 2:44 pm
مشاركات: 19
msobieh كتب:

إعلان عن مسلسل

وصفوا النقاد ما حدث بأنه أحسن دعاية وأقواها خلال العشر سنين السابقة ..


لقيت فعلا كلام كتير انه اعلان عن مسلسل يا سيدنا
وفعلا حركة ذكية جدا للترويج للمسلسل


أعلى
 يشاهد الملف الشخصي  
 
عرض مشاركات سابقة منذ:  مرتبة بواسطة  
إرسال موضوع جديد الرد على الموضوع  [ 4 مشاركة ] 

جميع الأوقات تستخدم GMT + ساعتين


الموجودون الآن

المستخدمون المتصفحون لهذا المنتدى: [AhrefsBot] و 5 زائر/زوار


لا تستطيع كتابة مواضيع جديدة في هذا المنتدى
لا تستطيع كتابة ردود في هذا المنتدى
لا تستطيع تعديل مشاركاتك في هذا المنتدى
لا تستطيع حذف مشاركاتك في هذا المنتدى
لا تستطيع إرفاق ملف في هذا المنتدى

البحث عن:
الانتقال الى:  
© 2011 www.msobieh.com

جميع المواضيع والآراء والتعليقات والردود والصور المنشورة في المنتديات تعبر عن رأي أصحابها فقط