موقع د. محمود صبيح

تجديد الخطاب الديني وجرجرة المشايخ
الموضوع ده طويل شوية ومحتاج تركيز وعلشان كدة هاتكلم فيه بالعامية وعلى أد مااقدر هاحاول ابسط الموضوع


قصة تجديد الخطاب الديني بقت لبانة عند ناس كثير
وكل واحد في دماغه وش كثير ومش عارف ينشره يقوم طالع باللبانة ويقول تجديد الخطاب الديني


المشكلة مش فيهم
المشكلة في المشايخ اللي بتتجرجر في سكتهم ويضحك عليهم
للأسف بيضحك عليهم


في مناظرة اسلام البحيري والازهري والجفري كانت واضحة جدا
على رغم جهل اسلام وروعة المناظرة الا ان الجرجرة كانت واضحة جدا وخاصة في قصة زواج الصغيرة ومن كتر الضغط الحبيب اضطر انه يقول انه امر استثنائي

وفي قصة ان الائمة مش معصومين وانهم ممكن يغلطوا وركز قوي في قصة انهم ممكن يغلطوا

وفي قصة بن تيمية وتكلف التبرير له والدفاع عنه ووصفه بأنه امام كبير ووضعه بجانب ساداتنا الائمة رضوان الله عليهم وكأنه زيهم

وفي لقاء معز والشيخ اسامة كانت الجرجرة ايه كبيرة جدا وعلى ودنه
خد عندك ياسيدي


الائمة قاموا بواجب وقتهم وكثر خيرهم على كدة (لا والنبي فرقت ايه بقى عن اسلام)


احنا كمان نقوم بواجب وقتنا ونعمل زيهم ( والله العظيم اسلام بشكل جديد)


زواج السيدة عائشة وسنها مش واضح ومتأكدين منه (بجد مش هانرد)


ممكن واحدة اسلمت ومتجوزة مسيحي تفضل معاه علشان نقول ان الاسلام جميل (ده حتى اسلام ماقدرش يقولها)


قصة سحر النبي صلى الله عليه وسلم وان هناك بعض من انكره من العلماء ومافيش مشكلة في اتباعهم (افرح يااسلام)


قصة الشرع القرآني واجتهاد سيدنا عمر بما يخالفه او انه عمل حاجة جديدة وايه بقى نمشي ورا النبي صلى الله عليه وسلم ولا ورا سيدنا عمر (وضع الصحابة والائمة في مواجهة الشرع__بركاتك يااسلام)


كل ده وايه بقى الشيخ اسامة الازهري ماردش بقوة زي ماعمل مع اسلام


كل ده واكثر بيوضح لاي واحد عنده عقل وبصيرة قصة جرجرة المشايخ لسكك طويلة ومعوجة
وعلشان كدة لازم امور كثيرة لازم توضح وتبان
واهمها قصة تجديد الخطاب الديني


الاول كدة نسألأ سوءال
ايه هو عناصر الخطاب الديني اللي هم عاوزين يجددوه
1/المتكلم اللي هو الخطيب


2/المستمع والمخاطب بمعنى الجمهور الموجه له الخطاب


3/الكلام نفسه اللي هو المحتوى والرسالة اللي بيتم توصيلها


4/ الادوات المستخدمة من قبل المتكلم


5/البيئة والحالة العامة


البهوات ماسكين في عنصر واحد وهو الكلام والرسالة المنقولة من كتب التراث وسايبين الباقي وده يورينا اد ايه النوايا مش سالكة وصافية واد ايه مشايخنا مغيبين

طيب في البداية كدة نقول

الكلام والرسالة المنقولة من كتب التراث مافيهاش اي مشكلة ولا اي غلط زي مابيصوروا ومش هي المشكلة وده لسببين


الاول:- المنهج التراثي ده اللي وضعه في مصر وجعله اساس في تكوين العقلية المسلمة في مصر هو صلاح الدين الايوبي بعد لما اسقط دولة الشيعة
جمع علماء اهل السنة وطلب منهم وضع عقيدة اهل السنة في صورة شعر وسموها الفصول والجواهر او العقيدة الصلاحية وامر بحفظها وتحفيظها للاطفال والكبار وامر بنشر فقه المذاهب الاربعة وخاصة الفقه الشافعي ونشر التصوف من خلال التكايا والزوايا الصوفية وكان اسمها الخانقاه


ده كان استراتيجية صلاح الدين في محاربة التشيع وكمان في تكوين العقليات المسلمة
اي فكر مغاير كان يجرم وصاحبه معرض للحبس او النفي ومصادرة الاموال حتى الاعدام


طيب نتيجة كدة ايه

اتكونت الدولة المصرية العميقة على اساس رؤى وفلسفة صلاح الدين
والنتيجة هزيمة الصليبين والتتار وهو نفس منهج محمد الفاتح بشرى رسول الله صلى الله عليه وسلم اللي فتح القسطنطينية واسس لاهم دولة في التاريخ
لما تحب تهزم الامة تعمل ايه
العب في منهجها وعقلها وتفكيرها

لو كانت المشكلة في المحتوى كان بان من ايام صلاح الدين
علشان كدة هاتلاحظوا ان ابراهيم عيسى وامثاله في حلقاتهم لم يخفوا ضيقهم من صلاح الدين واللي متابع ابراهيم عيسى هايكون سمع عدة مرات بأن صلاح الدين عسكريا حلو بس سياسيا عمل مصايب

ده اولا


وثانيا : اكبر دليل ان المحتوى مش سبب المشاكل في زمنا غير موضوع صلاح الدين هو ان في زمان مش المشكلة هاتقول ايه ولكن هاتقولها ازاي


وحلقة معز اكبر دليل
هو قال نفس كلام البحيري واشد بس بشكل حلو وشيك وامور وجميل
المشكلة مش في التراث المشكلة في بقية العناصر
احنا بقى لازم نفصلهم عنصر عنصر وهايبان ان فيه لعبة قوية وشديدة بتتعمل علينا علشان اليهود يضمنوا انه مافيش صلاح الدين جديد يظهر

يتبع