الاقتصاد المصري علي حافة الانهيار

molhma · **مرسل:** الجمعة مارس 11, 2022 10:13 pm

msobieh كتب:

الصين حلوة ...

حتى لا أحرم كتب:

وان كنت سمعت احد أعضاء اللجنة الاقتصادية بمجلس الشعب- على ما أذكر- يقول أن هذا الإجراء لن يكون له أي تأثير على الأسعار

حتى لا أحرم · **مرسل:** الجمعة مارس 11, 2022 10:23 pm

msobieh · **مرسل:** الجمعة مارس 11, 2022 10:26 pm

مع معافاة الشركات الأجنبية

وأيضا رفع الرسوم من واحد في الألف إلى واحد في المية؟

وربنا يلطف

هيثم كتب:

حتى لا أحرم كتب:

هيثم كتب:

زيادة الاسعار بسبب قرارات البنك المركزى
قرر البنك المركزي المصري وقف التعامل بما يعرف بمستندات التحصيل في دفع قيمة السلع المستوردة، ولجأ لما يسمى الاعتمادات المستندية.

[/size]

كريم أحمد · **مرسل:** الجمعة مارس 11, 2022 10:27 pm

msobieh كتب:

الحديد بس ؟

الله يهديك ..

كريم أحمد كتب:

كمان يا مولانا
روسيا و أوكرانيا من اهم موردى الحديد
و ممكن الحرب الدائرة حاليا تؤثر على مشاريع البناء و تعطلها كثيرا
و ماعنديش شك ان الصراع هناك هيخلى اسعار الحديد تولع عالميا

مش قصدى ...لكن اقصد ان ده له تأثير مباشر على مشاريع البنية التحتية

حتى لا أحرم · **مرسل:** الجمعة مارس 11, 2022 10:29 pm

اللهم آمين يا رب العالمين... ربنا يلطف بينا

ويعين الحاكم والمحكوم

هيثم · **مرسل:** الجمعة مارس 11, 2022 10:30 pm

واضح جدا أن البنوك عايزه سيوله

msobieh · **مرسل:** الجمعة مارس 11, 2022 10:49 pm

ومع تحفظاتي على تحليلات كثيرة لهاني توفيق, لكن أضع بوستين له

https://www.facebook.com/hany.tawfik2/p ... 2169930517

https://www.facebook.com/hany.tawfik2/p ... 1719320562

بالاضافة إلى كلامه مع لميس

مع تحفظي عليها طبعا

حامد الديب · **مرسل:** الجمعة مارس 11, 2022 10:53 pm

msobieh كتب:

ومع تحفظاتي على تحليلات كثيرة لهاني توفيق, لكن أضع بوستين له

https://www.facebook.com/hany.tawfik2/p ... 2169930517

https://www.facebook.com/hany.tawfik2/p ... 1719320562

بالاضافة إلى كلامه مع لميس

مع تحفظي عليها طبعا

ربنا يسترها - يبدو ان 2022 محورر المحاور فى العالم كله

خلف الظلال · **مرسل:** الجمعة مارس 11, 2022 10:55 pm

msobieh كتب:

ومع تحفظاتي على تحليلات كثيرة لهاني توفيق, لكن أضع بوستين له

https://www.facebook.com/hany.tawfik2/p ... 2169930517

https://www.facebook.com/hany.tawfik2/p ... 1719320562

بالاضافة إلى كلامه مع لميس

مع تحفظي عليها طبعا

بخصوص البوست التاني، سمعت ان المستثمرين كسبوا من غير ما يستثمروا ولا مليم أصلا، ومكسبهم جيه من فروق العملة

كريم أحمد · **مرسل:** الجمعة مارس 11, 2022 10:55 pm

الربع الأول اهو نوعا ما مار بسلام
إن شاء الله
ربنا يستر على الثلاث اربع الباقيين

المهاجرة · **مرسل:** الجمعة مارس 11, 2022 10:55 pm

يالطيف يارب

حتى لا أحرم · **مرسل:** الجمعة مارس 11, 2022 10:57 pm

نسأل الله الستر واللطف... ونعوذ بالله من غلبة الدين وقهر الرجال

سكينة · **مرسل:** الجمعة مارس 11, 2022 11:02 pm

حتى لا أحرم كتب:

نسأل الله الستر واللطف... ونعوذ بالله من غلبة الدين وقهر الرجال

admin2 · **مرسل:** الجمعة مارس 11, 2022 11:09 pm

الأخوة الأفاضل :

ملاحظة أن عنوان هذا الموضوع خلال سنة : 2012

عنوان المشاركة: الاقتصاد المصري علي حافة الانهيار
مشاركةمرسل: الخميس ديسمبر 27, 2012 6:43 pm

أحمد ماهرالبدوى · **مرسل:** الخميس نوفمبر 30, 2023 12:52 am

ملف الاقتصاد المصرى الفترة القادمة
٢٨-١١-٢٠٢٣
#ملف_الاقتصاد_المصري_كاملا:

اقروا بتأني كأنكم بتذاكروا عشان الموضوع يبقا سهل

بسم الله توكلنا علي الله :
مجموعة بريكس :
احنا اتكلمنا قبل كده عن بريكس و اسباب انضمام مصر لبريكس و سعيها خلفها في 6 بوستات سابقة

المأخذ اللي بيهري فيه الهبيدة بتوعنا .. هو ان واردات مصر من دول بريكس أكتر من صادراتها
وحاليا دي حقيقة
لكن مستقبلا أنا مجهز ايه ل بريكس

مجهز
مشروعات الطاقة الخضراء و الهيدروجين الاخضر
رقعات زراعية جديدة
كهرباء
غاز

دول احجار الزاوية اللي هلعب عليها
مع دراسة وافية لاحتياجات دول المجموعة و خطة لتمكين الدولة المصرية لتوفيرها

روسيا :
بتستورد سفن و قوارب صيد مصر انتهت تماما من المرحلة الاولي و التانية من مصانع بناء اساطيل الصيد و السفن و القوارب في بورسعيد و أنتج بالفعل و صدرنا منه لليابان كمان
" اليابان بتحتاج كميات سنوية كويسة من سفن الصيد وتكلفة استيرادها من مصر بالنسبة لها اوفر من التصنيع "
روسيا بتحتاج زيوت عطرية لأنها بتستخدمها في منتجات كتير عندها مصر بتزرع حاليا 80 الف فدان و بإنتهاء 2028 هتوصل ل 150 ألف فدان
و نصف اعتماد روسيا علي استيرادها حاليا من مصر
روسيا بتحتاج سكر لعدم قدرتها علي زراعة قصب او بنجر السكر بسبب المناخ مصر زودت رقعة البنجر المزروعة اجمالا ل 35000 فدان
و انا كنت جبتلكم التقرير الامريكي بتاع منظمة الزراعة الدولية قبل كده

الصين :
الصين بتحتاج وقود معدني مصر دخلت شريك في المشروع الثلاثي للبترول و الغاز العراقي مع روسيا و العراق
الصين بتحتاج فواكه و خضار مصر جهزت مشروع الدلتا الجديد و خطة التصدير تستهدف رفع القيمة من 76.8 مليون دولار الي 150 مليون دولار بحلول 2026
الصين بتحتاج اسمدة مصر حاليا حققت تقدم كبير جدا في مجال الاسمدة
سواء كيماوية او ازوتية او خضراء
جهزنا مصنع الامونيا الخضراء وصدرنا منه للامارات و الصين
جهزنا مجمع الاسمدة الازوتية
جهزنا كيما 1 & 2
و بنستهدف خطة تصدير اسمدة للعالم ب 100 مليار دولار

الهند :
الهند بتحتاج بترول قولنا مشروع الشام الجديد و الثلاثي بالعراق
الهند بتحتاج غاز كنا قولنا من شهر عن 12 حقل غاز جدد مصر طرحتهم للمزايدة للتنقيب
و الحمد لله شركة شل اعلنت عن مينا ويست شمال العامرية .. و ايني اول امبارح اعلنت عن حقل تاني باحتياطي 100 مليون قدم مكعب و هيبدأ الانتاج في خلال سنة بالكتير
و جاري العمل علي 4 مناطق اخري
بالاضافة لخط انابيب جديد و محطتين جدد للاسالة
الهند بتحتاج اسمدة و قولنا خطة مصر

البرازيل :
البرازيل اتفقت مع مصر علي توفير كل النواقص اللي عندها بطريقة سداد مريحة آجلة من سنة الي سنتين

دي اهم دول ممكن تقول ان ميزانها اعلي منك
------------------------------------------------
الدولار و السوق السوداء :
كل العالم عنده سوق سودا مش مصر بس .. امريكا نفسها عندها سوق سودا لعملات مغايرة
" الفارق في مصر ان المواطن المصري اللطيف شريك مع المافيا ... لانه بيعتبر الدولار سلعة مضاربات و بيخزنها و بيضارب عليها و حاجة زي الفل الحقيقة "

لكن السؤال ليه ظهر في مصر أزمة دولار بالشكل الصعب ده
اولا : حرب روسيا و اوكرانيا تسببت في حالة تضخم عالمي .. التضخم ده خلي المركزي الفيدرالي حتي يكبحه يرفع الفايدة ... و يسحب الاموال من استثمارات لادخارات
و ده تسبب في هروب الاموال الساخنة من مصر
الاموال الساخنة هي استثمارات قصيرة الاجل تعتمد علي المضاربات السريعة لتحقيق أعلي ربح
وحجم الاموال دي 22 مليار دولار .. خرجت من البلد في فترة 4 الي 6 شهور
كنت محتاج تسدد المبالغ دي من حجم العملة الموجودة عندك و إلا هتتفضح عالميا
اما تسحبها من البنوك عندك و تسيب البنوك تعاني من نقص سيولة دولارية
او تصدر سندات و اذون خزانة و تستدين بشكل او اخر
او تسحبها من احتياطي النقد الاجنبي عندك

وكان اختيار الدولة هو الاختيار الاول و التاني و البعد عن الاحتياطي تماما

ثانيا : الخيانة العظمي اللي ارتكبها المصريين في الخارج
وهي تحويل 33% من تحويلاتهم الي السوق السودا بدلا من البنوك الرسمية
مش كلمة خيانة عظمي دي كلمة كبيرة شوية يا چيلان

لا ما انا هفهمك
مصر فقدت 10.8 مليار دولار من حجم التحويلات
حط 10.8 + 22 = 32.8 مليار دولار
اللي هو حجم الفجوة التمويلية اللي بنتكلم فيه و اللي كل تقارير فيتش و ميتش و بيتش قارفينا بيه مصر عندها فجوة تمويلية حوالي 30 مليار دولار .. لازم تخفض العملة " تعوم " عشان تقدر تجتذب استثمارات تمولها
يبقا انت هنا حطيت البلد في مصيبتين
المصيبة الاولي عشان اغطي الفجوة دي اضطريت استدين
عن طريق سندات بفايدة 11%
السندات دي نوعتها مابين قصيرة الاجل و طويلة الاجل
عليت عندي رقم الدين
( فلما حد يسألني هو ازاي بندفع ديون في مواعيدها ومع ذلك مبلغ الدين مش بينزل اوووي كما متوقع عشان انت بتمول فجوة 30 مليار دولار
المصيبة التانية عندم فجوة تمويلية في ظل وجود التضخم
ف انت رافع معدلات الفايدة اقراض و اقتراض
يبقا تكلفة الحصول علي أموال نفسها بقت عالية
ده يزود تكلفة انتاج اي سلعة و بالتالي يرفع الاسعار

طيب ال 22 مليار بتوع الاموال الساخنة منقدروش نقولولهم حاجة .. اجاااانب و عايزين فلوسهم
انما ابن البلد الواطي اللي منع فلوسه عن البلد بقااااا
الدولة قدرت توفر 14.8 مليار دولار من الفجوة التمويلية
تخيل لو كانوا ال10 مليار بتوع التحويلات موجودين .. يبقا هنا الفجوة كانت هتبقا 5.2 مليار دولار .. مبلغ مش مستاهل

انما المواطن المغترب الفهلوي خرب بيته و بيتي و بيت 70 مليون مصري بيعانوا من ارتفاع اسعار
و لو هو فاكر انه استفاد بالفرق يبقا حماااار
لييييه لانه لو كان بيبعت للمدام 10000 جنيه في الشهر مصروف .. التضخم 40% ف بقت محتاجة 14 الف
و في ألفين كمان ل " التجار " يبقا بقت محتاجة 16 ألف
اضرب 6000× 12 شهر
يبقا انت اتكلفت زيادة 72 الف جنيه
ياتري كسبتهم من السوق السودا ... أتحداك
و دي فاتورة غباءك وخيانتك اللي دفعها معاك 70 مليون مصري متضرر
و فلوس حرام
ما هو انت اشقيت عيشة 70 مليون ... و المال اللي يجي بشق نفس غيرك ده مال حرام ... ربنا مبيضحكش عليه يا مفتح
كل حسبي الله ونعم الوكيل بتطلع من فم ست ال 200 جنيه مش قادرة تكفيها وجبة غدا محترمة ... ربناشايلك منها انت وولادك و امك اللي معرفتش تربيك و ابوك اللي طلعك جعان بالشكل ده نصيب

الدولة بقا عملت ايه عشان تواجه شريحة الجعانين دول الكرباج

مش انت اما اتسبت علي راحتك خربت بيتنا .. خلاص بالكرباج بقا
ابليكشن أنستاباي الخاص بالبنك المركزي المصري
و تقريبا خلص الاتفاقيات بتاعته في دول الخليج كلها
( ما هو اصل المغترب في اوروبا و امريكا الحقيقة موسخش مع البلد في حوار السوق السودا ده و ال 8 مليار اللي بيجوا منهم منقصوش حاجة ... الجعانين بتوع السوق السودا طلعوا من اللي في الخليج هما اللي خربوا الدنيا )
طبعا انت عشان تحول في اي شركة .. هتطلع بسبورك .. يقوم الموظف يقولك خوي انت مصري لا والله حياك الله علي انستاباي عشان انت مواطن لازم ينضرب بالكرباج المالي مفيش لك تحويل عندنا
ف يبقا كل دولار هتحوله هيدخل البنك المركزي
( اووووو تضطر تتعامل مع عصابات السوريين بقا .. و ينصبوا عليكم و ياخدوا الفلوس يطلعوا بيها علي نوادي القمار في فرنسا )
اليوم اللي هقرا فيه خبر ان مستريح سوري قلب مغتربين مصريين في مبلغ محترم كده و خلع علي اوروبا .. هدبح عجل لله فرحة فيكم عشان تبقوا تجوعوا الغلابة كويس

طيب ايه الخطوات الأخري اللي اتخذتها الدولة لتحويل الدولار الي تاريخ
التبادل التجاري بالعملات المحلية :
و ده تم مع مجموعة بريكس كلها
و بناءا عليه بادلنا جنيه مع درهم مع الامارات .. و يوان مع الصين .. و روبل مع روسيا .. و روبية مع الهند
و الخميس القادم تبادل الريال السعودي

حد بقا جابلي بوست لخبير فيسبؤسي
بيقول ده احنا داخلين علي تضخم اكبر هيوصل ل 100% بسبب تبادل العملات ده .. لأن البنك المركزي هيطبع جنيه بدون غطاء دهب .. احنا هنروح في دااااهية الاقتصاد بيغررررق

ف من حق الخبير اللي اساسا فاشل في مهنته و اعلن افلاس شركته .. يطمن
انا هنا عشان اطمنك

تبادل العملات مصر كسبانة فيه
و ده بسبب ان حجم السيولة المالية في مصر في 1/7/2023 8.3 تريليون جنيه
و ده بيتسبب في حدوث فائض
الفائض ده بيعادل 100 مليار جنيه اسبوعيا بيقوم البنك المركزي بسحبهم من البنوك كل يوم ثلاثاء و يحولهم لخزينته .. يعني عندك فائض سيولة سنوي تريليون و 200 مليار جنيه
بالتالي أمامنا 10 سنين عشان نحتاج نطبع بنكنوت
خلال ال 10 سنين دول هتكون الچاكو صدرت بقيمة عادلة
و بالتالى مش هتطبع إلا ما يعادل 50% من البنكنوت الهالك زي كل 3 سنين عاااادي

اجراء تالت المقايضة الدولية
و ده هنعمله مع دولة زي تركيا
دولة خارج بريكس
و ميزان مدفوعاتي شبه متوازن
و طلبات الشراء الجديدة بتاعتها هتخلي صادراتي لها اكتر من وارداتي
بالتالي هخصم قيمة الواردات من الصادرات .. لو ليا دولار هاخده لو عليا دولار هدفعه
و نفس الحال مع 11 دولة افريقية اخري

اجراء آخر العملة الرقمية :
اللي هو الجنيه الرقمي
ده جنيه افتراضي موجود لك في البنك هتشتريه بجنيهات عادية وتعمل رصيد
و تبيع وتشتري بيه
زيه زي المدفوعات الاونلاين كده .. بس بدل ما يخصم من رصيد الجنيه النقدي في الفيزا .. هيخصم من فيزا الرقمنة
و ده طبعا هيحكم السوق السودا جداااا .. لأنك مش هتحتاج دولار
انت هتستورد بالجنيه العادي و الرقمي
عايز الدولار في ايه
( الا لو هتجيب شيكولا ليندت او تبوليغون من سويسرا .. ف معلش روح السوق السودا انت عاااادي واعمل حسابي في 6 بار بقالي 3 سنين مجبتهاش

هنا بقا عايزة اجاوب سؤال مهم ليه السعر العادل للدولار 19.6 ج/ دولار
و مع ذلك مؤشر الجنيه " اللي هو اعادة تقييم الجنيه وفقا لسلة عملات مختلفة " خرج ب 24.85 ج / دولار

الاجابة في سببين :
التضخم اللي تسبب في انخفاض القوة الشرائية للجنيه
بالتالي قيمته بتقل
" يعني اللي كنت تقدر تشتريه بالجنيه كميته قلت "
توالي عدد مرات خفض العملة
احنا في 2023 بسسسس خفضنا العملة 3 مرات
ده طبعا يؤثر علي قيمته امام عملات اخري داخل سلة العملات

كده خلص الدولار
فاضل نقطة واحدة هو احنا هنستغني عنه خااالص .. يعني هنطلق الدولار بالتلاتة
لا يا عزيزي احنا هنغضبه عن اهله و هنسيبه زي البيت الوقف كده
اولا هحتاج دولار في
سداد اقساط الديون
استيراد بعض السلع من دول لا تتداول الا دولار
" زي المعدات التقيلة مثلا "
السياحة خارج مصر
" افرض ايمن ابن احلام كراوية عايز يصيف في برشلونة و لا في جزر الكناري البنك يقوله اييييه .. مفيش دولار
انت عايزه يروح يرزعنا بوست عن تدمير الاقتصاد يخلي وكالة فيتش تخفض تصنيفنا .. لا ما هو الدكتور حلمبوحة اللي ال Top Fan بتاعه ايمن مفكر ان فيتش متابعة بوستاته .. و هو فيتش حد يعرفه الا مراته وولاده و عمرو اديب و الناس بتغير القناة كمان بتجيب همة مرتدة علي dmc

ثانيا :
قناة السويس بتستقبل حركة تجارة من دول لا تتعامل الا بالدولار .. هتقولها ايه روحوا فكوا وتعالوا
في عندك سياحة اوروبية .. مدفوعاتها دولارية

ف انت هتحتاج دولار في حدود من 23% الي 28% من موازنتك
الايرادات الدولارية في حدود 33%
ف الفجوة التمويلية الدولارية مع الوقت هتتحول من عجز الي فائض نسبته 5% بأمر الله تعالي
------------------------------------------------
مجالات الاستثمارات الجديدة في مصر :

وفقا ل 5 تقارير اقتصادية عن مصر منهم تقريرين صادرين عن لجنة حكماء الاقتصاد في ألمانيا
و دي لجنة وجودها اهم من وزارة الاقتصاد نفسها هناك
قالت مصر بيئة اقتصادية واعدة للغاية و ان أي دولة من استراتيجياتها الاقتصادية الاستثمار في الخارج .. عليها حجز مكان في مصر

صاحبة التقرير ده مونيكا شنيستر رئيسة لجنة حكماء الاقتصاد و اتنشر في جريدة راينشيه بوست
كمان معهد كييل للاقتصاد في ألمانيا أصدر تقرير من 4 صفحات في تاريخ 27 اغسطس 2021
عن المنطقة الاقتصادية لقناة السويس و انها بحلول عام 2030 هتكون واحدة من اهم 5 مناطق صناعية في العالم
معهد واشنطن للدراسات الاقتصادية بقا راح معلي علي معهد كييل
و قال لا هو تحديدا المنطقة الاقتصادية لقناة السويس هتكون المنطقة الاقتصادية رقم 3 عالميا
بعد نيويورك و هونج كونج

طيب ما تيجوا نشوف مصر بتجهز ايه او شغالة علي ايه عشان تستحق التقارير و التوصيات دي

اولا : الرقائق الالكترونية :
و هنا مصر قررت تقتحم المجال ده عن طريق شراكتين :
الشراكة الاولي تمت في 10 سبتمبر 2022 مع شركة ST Microelectronics
و دي شركة فرنسية ايطالية داخلة باستثمارات 700 مليون دولار
وبالفعل عملنا مصنع السليكون في المنطقة الصناعية بالعلمين
و الشركة عملت مركز ابحاث و دراسات في المعادي
وصل عدد المهندسين اللي بيدرسوا فيه ل 72 مهندس اوشكوا علي التخرج

الشراكة التانية مع الصين
و الصين بقا واخدة خطوات جادة بتدمير تايوان اقتصاديا
خصصت مبلغ تريليون يوان " 143 مليار دولار " للاستثمار و صناعة الرقائق الالكترونية
و لمصر نصيب في المبلغ ده عن طريق مصنع في المنطقة الصينية بالمنطقة الاقتصادية لقناة السويس

طب هل مصر هتفضل معتمدة علي الشراكات كده
اكيد لا مصر انشأت حاجة اسمها التحالف المصري لأشباه الموصلات .. و ده قوامه 20 شركة شبه متخصصة
و الشركات دي بدأت من فبراير 2023 في ارسال مهندسين من عندها في بعثات دراسية في امريكا و ألمانيا و فرنسا لدراسة الصناعة دي
" فاكرين في الدراسات الاجتماعية اما كنا بندرس عصر محمد علي و نقول قام بإرسال البعثات الدراسية للنهوض بالصناعة "
أهو ده مجال جديد علينا .. يبقا نتعلم و ندرس

ثانيا : السيارات الكهربية :
بحلول عام 203 سيبدأ العالم في التخلي عن السيارات اللي بتشغل بالبنزين و الغاز

طيب مصر ملحقتش نصيب فيها .. وعملنا نصر و منه لله اللي قفلها
ف قررنا نلحق مكان في الصناعة الجديدة دي
تم اعادة تشغيل مصنع نصر .. وتم انتاج نصر E70 .. گ محاولة
صنعنا اتوبيسات لألمانيا و صدرناها
صنعنا اتوبيسات داخلية و بتشتغل بالفعل
في يناير 2024 هيبدأ انتاج عدد محدود من السيارات الكهربية ب 60% مكون محلي

يعني ماشيين في اتجاهين متوازيين
تصنيع داخلي تجارب تصدير

ثالثا : الطاقة الخضراء :
مصر اشتغلت في المجال ده علي 4 محاور انتاجية
" هيدروجين أخضر .. أمونيا خضراء .. ايماميثانول .. طاقة كهربية من الرياح"
وقعت عقود شراكات مع 3 جهات هامة جدا لانتاح كميات عملاقة
اتفاقية اكواباور السعودية لانشاء مزرعة رياح بقدرة 10 جيجاوات
اتفاقية شركة انفنيتي الاماراتية مع حسن علام للانشاءات لبناء مزرعة رياح بقدرة 10 جيجاوات
شراكة مع سكاتك النرويجية لانتاج 3 جيجاوات
و مصنع الهيدروجين الاخضر بقدرة 100 ميجاوات
لانتاج 15 ألف طن هيدروجين اخضر سنويا
و 90 الف طن امونيا خضراء

و يوم 20 نوفمبر 2023 هتروح حضرتك علي موقع Taqqa " ده موقع رسمي دولي "
هتلاقي مانشيت انبهاري مصر تقوم بتصدير أول شحنة امونيا خضراء في العالم
فاهم يا عزيزي اول شحنة في العاااااااالم
يعني انت اخدت الريادة العالمية في مجال بيتسابق اليه دول العالم كله
و طبعا ده خبر مخدش حقه نهائي بسبب غزة .. مع انه شئ في غاية الاهمية

قدر رئيس المنطقة الاقتصادية لقناة السويس وليد جمال الدين انه يوقع 16 شراكة لانتاج الوقود الاخضر مع 9 دول
و المصانع في مرحلة الانشاء و التجهيز
" شراكة يعني انت شريك معاهم بتاخد ارباح و لك حق ادارة "

كمان عملنا خدمة تموين السفن بالوقود الاخضر و نجحنا فيه و في
18 اغسطس 2023 نفذنا أول عملية تموين لسفينة الحاويات Lara S التابعة لشركة OCI العالمية ب 500 طن ميثانول
و بكده بقت مصر مركز تقديم الخدمة دي في المنطقة عالميااااااا

رابعا : الطاقة الكهربية من المحطات النووية :
ليه مصر بتعمل محطة الضبعة و ليه هنعمل محطة جديدة علي البحر الاحمر
" خد معلومة من البلورة السحرية الچيلانية هنسمع خلال 2024 عن سعي الاردن لامتلاك محطة نووية .. ومصر هتكون شريك فيها "

محطة الضبعة هي حاجة هتوفر الطاقة المستدامة بتكلفة ارخص
و بالتالي هتقلل من اعتمادنا علي البترول و الغاز وحفظ نصيب الاجيال القادمة
محطة الضبعة هتنتج 1200 ميجاوات للوحدة .. و هو فيه 4 وحدات
و ده هيمكنا من تصدير الكهرباء لافريقيا
" و احنا اتعلمنا مع چيلان اييييه قوتك الاقتصادية في مكان ما هي اللي هتحقق لك السيادة السياسية فيه "
محطة الضبعة فتحت مجال جديد للتعيينات الوظيفية و ده هيخفض نسبة البطالة
ميزة اجتماعية كمان لاااااازم هيحصل تطوير عمراني في المحافظات القريبة زي مطروح
و دي محافظة بتعيش شهور الشتا علي ايرادات المصيف
طبعا ده هيتغير و اتعمل لها خطة متكاملة

خامسا : انتاج و إسالة الغاز الطبيعي :
و سبحان ربي العظيم
ربنا كان قافل علينا خزاين الغاز لحد ما يجي العبد الصالح عبدالفتاح السيسي .. عشان يظهر لنا ظهر و نور و نرجس
و يبقا انتاج مصر من الغاز الطبيعي 6.2 مليار قدم مكعب يوميا " ده تقرير شركة ايجاس في 28 سبتمبر 2023 .. تبارك الله "
ويكون حجم صادراتنا في 2022 منه 8.4 مليار دولار

" مصر بتستهلك من الانتاج 5.9 مليار قدم "
لكن استكمالا ل جون الغاز
ربنا بيكرمنا كل فترة
و طرحنا 12 منطقة تنقيب للمزايدة .. انهينا التعاقد مع 3 شركات في 6 مناطق
شل اعلنت عن حقل ميناويست شمال العامرية .. و هتعلن عن حجم الاحتياطي فيه يوم 17 ديسمبر 2023
ايني اعلنت اول امبارح عن اكتشاف حقل حابي في البحر المتوسط ب احتياطي 10 تريليون قدم ما شاء الله
تاج اويل الكندية اعلنت عن اكتشاف كميات تقارب 14 تريليون قدم في حقل " تي " بالصحراء الغربية و اعمال الحفر هتبدأ في نصف ديسمبر القادم

سادسا : المطارات و الموانئ و الخدمات اللوجيستية :
لأول مرة في تاريخ مصر بتنتهج نهج الدول الكبري لتقديم الخدمات الدولية اللوجيستية سواء في مجال النقل او مجال الانتقالات
" و دي حاجة و دي حاجة "
لذلك مشيت مصر علي خطة من 9 سنين لتطوير و انشاء موانئ و مطارات
اولا : الموانيء :
و دي بتتقسم ل جافة و بحرية
نبدا كده بالبحرية :
1/ تطوير ميناء اسكندرية الكبير :
انشأنا محطة تحيا مصر متعددة الاغراض
طول الارصفة 2.5 كم و مساحة المحطة 560 ألف متر مربع
قدرة استيعابها من 12ل 15 مليون طن بضايع
غير تخصيص رصيف رقم 3/85 الخاص بتداول الغلال و الاخشاب بطول 433 م و بيستوعب 70 الف طن
غير اقامة منطقة خدمات لوجيستية المرحلة الاولي اللي خلصت بس مساحتها 273 فدان

2/ ميناء دمياط :
اتعمل فيه محطة متعددة الاغراض .. رصيف بطول 681 م
جاري انشاء محطة تحيا مصر ارصفة بطول 2 كم .. تستوعب 3.5 مليون حاوية
" يعني تفريغ كونتينرز مش 3.5 مليون حاوية هيقفوا طابور في البحر "

ميناء نويبع :
المينا ده اتعمل فيه تطوير بس ب 475 مليون جنيه
واتعمل مخزن في سفاجا مساحته 5900 م بتكلفة 41 مليون جنيه
اتعمل ساحة شاحنات نقل تقيل في مينا سفاجا ب 49 مليون جنيه
اتعمل رصيف مينا بطول 65 م و تكلفة 74 مليون جنيه

4/ ميناء السخنة :
و ده تابع للمنطقة الاقتصادية لقناة السويس
اتعمل فيه 18 كم ارصفة جديدة .. بالاضافة لمساحة 5.6 كم منطقة تجارية و لوجيستية

5/ ميناء العريش :
ميناء السفن العملاقة اللي حارق الصهاينة
يعني احنا كنا شرحناه بالتفصيل
لكن اتعمل 1165 م ارصفة جديدة + 242 م رصيف قديم

المينا ده مختلف شوية لانه مرتبط بخط قطار الشام الجديد
معمول فيه صوامع تخزين عملاقة .. شركة تراتس كارچو الاماراتية انشأت 6 صوامع
في مخازن اسمنت اسود تستوعب لحد 75 الف طن
لحجم تداول سنوي 2 مليون طن
فيه منطقة تجارية و سياحية و ترانزيت
حجم الايرادات السنوية المتوقعة منه 28 مليون دولار

غير الاهمية السياسية و الامنية للميناء ده
و حجم المجتمع العمراني اللي بيتعمل حواليه

ميناء جربوب :
المينا ده هو اقرب مينا لاوروبا .. لكن هو مش معمول عشان يكون مينا بحري و بس
تكلفة انشاءه 10 مليار دولار
لييييه غالي كده
الغالي تمنه فيه يا عزيزي
ده اول ميناء سياحي في المنطقة .. هيعزز معاك السياحة لان الانتقالات بحريا ارخص
بيتعمل حواليه مدينة منتجعات سياحية .. هتقدم في جزء منها سياحة علاجية
فيه منطقة اقامة فنادق و مولات تجارية و مراكز تسوق عالمية
ميناء تجاري فيه كل خدمات الشحن و التفريغ
ومنطقة لوجيستية

و القرار الاخير لسيادة الرئيس هو انشاء منطقة اقتصادية فيه علي غرار قناة السويس
يبقا عندك شرق من السويس لسينا .. و غرب ل سرت / الجفرة

7/ ميناء ابوقير :
و ده هيكون مرتبط بمدينة ابوقير الجديدة
اولي مدن الجيل الخامس في مصر

عبد الفتاح السيسي عمل كل المواني دي ليه
عشان يقدر يدخل مصر علي خريطة مشغلين الموانيء الملاحية العالميين
و بالفعل نجحنا في ابرام شراكات و عقود مع
الخط الملاحي MSC مع ميناء الدخيلة
الخط الملاحي Marshal مع مينا شرق بورسعيد
الخطوط الملاحية CGM & CMA مع مينا اسكندرية
و مع مينا السخنة
الخط الملاحي COSCO و مجموعة مواني دبي مع مينا السخنة
الخط الملاحي Euro Gate مع مينا دمياط
الخط الملاحي evergreen مع مينا ابو قير
مجموعة مواني ابو ظبي مع مينا سفاجا
مجموعة مواني هونج كونج مع مينا العريش

الخطوط دي كلها هتشتغل عندك .. اي نقل ملاحي بتقوم بيه هتبقا انت جزء من مسار رحلتها
اي سلع جاية لافريقيا هتيجي الدولة الافريقية تستلمها من الموانيء بتاعتك
" الشئ بالشئ يذكر فاكرين خبر انشاء خطين سكة حديد من مصر لافريقيا
اهي الخطوط دي لخدمة المواني .. عشان تنقلهم بضاعتهم و تستفيد "

نسكتوا علي كده .. ابدااااا
ثانيا : الموانيء الجافة :
مصر عندها خطة لاكتمال 14 مينا جاف
خلص منهم 6
ميناء اكتوبر
ميناء برج العرب
ميناء السادات
ميناء سوهاج الجديدة
ميناء مدينة بدر
ميناء السلوم
ميناء العاشر من رمضان " هننتهي منه في يونيو القادم "

ليه بنعملوا المواني دي
لو تلاحظ هي في مناطق صناعية
و ده لتقديم خدمات النقل و الشحن و التفريغ
و كذلك فيها مصانع صغيرة للتعبئة و التغليف
و فيها مخازن لتقليل التكدس في المينا البحري

و ده هيقلل من تكلفة السلعة و هيحقق لها ميزة تنافسية خارجية للتصدير

ثالثا : المواني الجوية .. المطارات يعني :
عندنا في مصر حاليا 12 مطار منها 7 مطارات دولية مصنفة انها class a ذات كفاءة عالية

وصدر لها تقرير اقتصادي من مركز واشنطن للدراسات الاقتصادية في 22 اغسطس 2022 انها افضل مطارات جاذبة للاستثمارات و مناسبة للتسوق خلال ال 10 سنين القادمة عالميا
" يا تري يا عزيزي و انت بتقرأ كده اخدت بالك من كام مرة قولنا فيها صدارة عالمية لشئ "
--------------------------------------------
سابعا : السياحة :
للامانة موضوع ان مصر تجتذب 11 مليون سائح دي حاجة مستفزة جداا

وعشان كده مصر وضعت خطة لجذب 30 مليون سائح سنويا لحد 2028 ثم 50 مليون سائح من 2029 ل 2033
و البداية مع افتتاح المتحف المصري الكبير في مايو القادم و حضور 15 مليون سائح

لكن في خطة عمل شغال عليها عمرو القاضي رئيس هيئة تنشيط السياحة
تبدا من اول تطوير شركات الطيران المصرية
القابضة للطيران اللي هي مصر للطيران و اللي مملوكة لوزارة الطيران المدني
شركة مصر للطيران تعاقدت علي اسطول طائرات جديد عبارة عن 10 طيارة ايرباص و 18 طيارة بوينج
و ده لجذب استثمارات خارجية للوصول مستوي ال 5 stars
تم الاتفاق مع شركة ألمانية مقرها هامبورج و برلين للحملات الاعلانية للترويج للسياحة في مصر
كمان بنشتغل باستراتيجية جديدة
وهي اقامة معارض سياحية خارج مصر .. زي المعرض المصري في سيدني استراليا يوم 18 ل 24 نوفمبر 2023
و اللي عرض اكتر من 4000 قطعة اثرية وحقق نجاح ممتاز
كمان الرئيس السيسي اعتمد خطة البدء في تنفيذ مشروعات السياحة العلاجية و تم رصد 1356 موقع تم اختيار منهم 700 موقع للبدء في العمل
السماح للمستثمرين الاستثمار في السياحة
و ده عند طريق بناء الفنادق و المنتجعات و القري

خطة السياحة خطة كبيرة وشاملة .. هي الزتونة فيها انها محتاجة صنايعية

و بكده نبقا خلصنا رؤوس الحربة اللي مصر بتجهزهم اقتصاديا و بالفعل اللي خلص منهم .. احنا عايشين من خيرهم بالفعل
------------------------------------------------
قناة السويس :

بعد عمل التفريعة التانية قناة السويس اصبحت اكثر اتساعا ونشاط
و بعد جفاف قناة بنما اصبحت هي الممر الملاحي الوحيد في العالم
وده خلانا نحولها لمنطقة اقتصادية
:
في العام المالي 2022/2023 نشاط المنطقة الاقتصادية لقناة السويس :
موافقة نهائية علي 46 مشروع
موافقة مبدئية علي 43 مشروع
تم تأسيس 54 شركة
صدرت من ادارة المنطقة 42 رخصة انشاء

جاري التفاوض علي 18 مشروع باستثمارات قيمتها 8.3 مليار دولار
نصيب المصريين منهم 25000 وظيفة
تم التعاقد بشكل مباشر علي 4 مشروعات تكلفتها 4 مليار دولار .. نصيب المصريين فيها 2000 فرصة عمل

المنطقة الاقتصادية فيها مناطق دولية :
المنطقة الروسية صن سيتي
المنطقة الصينية
المنطقة اليابانية للصناعات التكنولوجية
المنطقة النرويجية
المنطقة الهندية للصناعات الثقيلة
المنطقة الهولندية

في المنطقة الاقتصادية في شراكات مصرية عملاقة
الاطراف الممثلة لمصر هي هيئة قناة السويس .. صندوق مصر السيادي .. الشركة المصرية للكهرباء .. هيئة الطاقة المتجددة "
دول بقا مشاركين مين
سكاتك النرويجية
اميا باور الاماراتية
رينيوايلز EDF الفرنسية
توتال الفرنسية
رينيو باور الهندية
ال FFI الاسترالية
جلوباليك البريطانية
الفنار السعودية
ابوظبي لطاقة المستقبل الاماراتية
انفنيتي الاماراتية

الشركات العشرة دول جايين ليه بقا عشان يستثمروا في الوقود الاخضر
عشان يقدروا يحجزوا مكان في الصدارة
بنهاية 2026 هتكون الشركات دي اتمت الطاقة الانتاجية 100%
-----------------------------------------------
خلصنا ملفات هامة
ومتبقي عندنا ملف الديون .. و انا تعمدت اختم بيه
عشان تقدر تحكم عقلك وتعرف لييييه كان لازم نستدين الديون :
قبل ما نتكلم عن ديون مصر
محتاجين نعرف كام معلومة

انواع الديون :
ديون قصيرة الاجل واللي بيستحق سدادها في فترة اقل من سنة
ديون طويلة الاجل ودي مدة استحقاقها سنة ف أكثر

كمان الديون بتتقسم الي :
ديون خارجية سواء لدول او لمؤسسات
ديون داخلية وهي قيمة المبالغ اللي مدينة بيها الحكومة
سواء لبنوك او وزارات او دول اخري

في تقسيمة تالتة للديون :
ديون نقدية زي القروض اللي بناخدها من صندوق النقد الدولي
اوراق مالية زي السندات و اذون الخزانة اللي بتصدرها الحكومة

وفي تقسيمة رابعة :
ديون استهلاكية هات فلوس اشتري بيها سلع .. و نزلها بأسعار اقل من تكلفتها .. وخلي الشعب يااااااكل
طب وهتسد منيين
الشعب لا ده انت لازم ترحل بقااااا .. احنا ناكل ااه انما تقولنا نسدد .. ده احنا عندنا فيسبوك و باقة ب 10 جنيه و هنقرفوووك
ديون انمائية و دي بتجيب 10 قروش تدخلهم في مشروع هيدر في اول 5 سنين 20 قرش
هتسدد ال 10 قروش
و تكسب 10 قروش و بعد كده الربح كله بتاعك

وفي تقسيمة خامسة :
ديون ب فوائد زي اللي مولنا بيها المطارات و المواني
ديون بدون فوايد
زي السندات الزرقاء اللي اصدرتها الحكومة من اسبوعين
بغرض تنظيف الممرات المائية و تطوير محطات التحلية
و دي بيشتريها بنوك تنمية زي بنك التنمية المحلي و البنك الدولي .... اسمها تمويل مشروعات بيئية مستدامة
زي قرض من بنك بريكس مثلا لانشاء جامعة او تعبيد طرق لقري فقيرة
زي قرض انشاء مترو اسكندرية

نيجي نشوف وضع مصر :
حجم الديون 160 مليار دولار تقريبا
كلهم ديون انمائية يعني دخلوا في مشروعات بتجيب فلوس .. تسدد الديون دي
من الديون دي ودايع في البنك المركزي لدول الخليج
مش هندفعوها .. لأنها هتتحول لاستثمارات
من الديون دي قيم سندات اصدرتها الحكومة لسوق المال الدولي
زي سندات اليورو و الدولار و اللي محققة نجاح في بورصات عالمية
و زي سندات الباندا و الساموراي
دايما مبلغ الديون قصيرة الاجل علي مصر بيتراوح ما بين 16 الي 24 مليار دولار
" في ظل وجود ايرادت قناة السويس .. عائد السياحة .. تحويلات من الخارج " فالاقساط موجودة و مفيش مرة تعثرنا
ديون مصر 36% من الناتج القومي
انا اعرف دولة كل شهرين ترفع سقف الدين و ديونها تعادل انتاجها و مبتدفعش سندات لحد بقالها سنة ... و بيسموها اقوي اقتصاد

فزاعة الديون بيستخدمها الارزقية و اللي مش لاقيين محتوي يقدموه للناس
عشان يبان انه بيفهم يعني .. وهو لو بيفهم يخرس خالص -------------------------------------------------
منظمة شنغهاي :
مصر بالفعل شريك حوار لمنظمة شنغهاي
لكن ما نسعي له و بيرحب بيه اخونا بوتين هو انضمام مصر الرسمي للمنظمة
ليه بقا الشق بوتين عايز مصر تدخل شنغهاي
اقولك شنغهاس منظمة مكونة من دول الاوراسي .. انما بوتين عايزها تبقا عالمية و اذرعها اكثر
" فاكرين لما قولنا زمان ان كل منظمات و مؤسسات النظام القديم ده هتتهد و يتم بناء مؤسسات حاكمة جديدة "

شنغهاي بقا اوسع شوية من بريكس
هي تجمع اقتصادي - سياسي - امني
مقرها في بكين الصين
فيها
10 اعضاء
مراقبين 3
6شركاء حوار ممنهم مصر
في الجانب الامني :
مكونة مجموعات عسكرية و سياسية لمواجهة الارهاب
كمان هي ضد الحركات الانفصالية
ومتعاونة في مجال مكافحة التجارة غير المشروعة زي تجارة المخدرات و البشر
عملت مناورات عسكرية
زي السلام 2005 .. 2007 ..2009
و في نواة لتكوين حلف عسكري " ناتو "
في الجانب الاقتصادي :
عندها مشروعات عملاقة في مجال الطاقة .. والتنقيب عن الغاز و النفط
عندها كيان للمشروعات المائية .. زي اقامة السدود و الممرات و مشروعات محطات التحلية
اسست كيان اسمه اتحاد البنوك المشتركة
وده معني ب..
تمويل مشروعات التنمية المستدامة بقروض بدون فوايد
فيه نظام مصرفي داخلي للتحويلات بعيدا عن سويفت و ده اللي سند مع روسيا جدا في العقوبات
" شوفوا هو بوتين كان جاهز للعقوبات و اشتغل الغرب كله "
كمان شنغهاي ملتزمة تجاه اعضاءها بتوفير الامن الغذائي

دخولنا شنغهاي هيفتح لنا اسواق في دول الاتحاد الاوراسي
هيحقق لنا تحالف عسكري قوي " بدل المكسحين اللي حوالينا "
هيساعدنا في تمويل مشروعات مجتمعية هامة

( ربنا ييسر و نقدر ننضم في يونيو .. ادعو لحد ابن اصول بيناور مع فلاديمير بوتابينكو احد نواب الامين العام عشان يسهل مهمة الملف المصري و شغال علي ثغراته
---------------------------------------------
بيع حصص الشركات المصرية :
أو ما يسمي ب برنامج الطروحات العام

و هو جزء من تخارج الحكومة من النشاط التجاري
لكن الحكومة مش هتتخارج تماما زي ما صندوق النقد شارط
مصر طرحت للبيع حصص ( أقلية ) في 50 شركة حكومية
للمستثمرين الاجانب و المحليين

اخدت بالك من كلمة حصص اقلية دي يعني حصص لا تخول لصاحبها حق الادارة او اتخاذ القرارات
يعني مازالت مصر المتحكمة في الشركات
اومال بنطرح الحصص ليه
جذب دولارات لتمويل الفجوة التمويلية
زيادة القيمة السوقية للشركة
استخدام فائض التمويل في توسيع نشاط الشركة

موضوع بقا بنبيع بالرخيص ده كذب في كذب
الشرقية للدخان متباعة حصتها علي سعر دولار السوق السودا وقتها 38.5 جنيه

موضوع ان في بنوك بتتعامل علي سعر اعلي " زي هبدة ال cib اللي بينفذ صفقات ب 48 ج/ دولار "
اتقالي بالحرف هاتيلي دليل علي الكلام الفارغ ده وانا اسحب ترخيص البنك
" ف ياريت نبطل ناخد معلوماتنا من الدكتور حلمبوحة و الاستاذ حلبسة "
---------------------------------------------

اللي قدمتهولك فوق ده هو حكاية الوطن اللي عايزين نكملوها .. هي خارطة الطريق المستقبل اللي بنبني بيه مستقبل يليق ببهية أرض الانبياء و مهد الحياة
اللهم اني اشهدك ان عملي هذا خالصا لوجهك الكريم ثم وجه الوطن ..... تحيا مصر لآخر عمري
د جيلان قاسم

موقع د. محمود صبيح

الاقتصاد المصري علي حافة الانهيار

الموجودون الآن