موقع د. محمود صبيح

منتدى موقع د. محمود صبيح

جميع الأوقات تستخدم GMT + ساعتين



إرسال موضوع جديد الرد على الموضوع  [ 11 مشاركة ] 
الكاتب رسالة
 عنوان المشاركة: الرجوع في الزمن
مشاركة غير مقروءةمرسل: الثلاثاء مايو 10, 2022 8:26 am 
غير متصل

اشترك في: السبت فبراير 06, 2010 8:26 pm
مشاركات: 13609
مكان: مصر
نظرية جديدة وتجربة تمت بالفعل أنقلها لحضراتكم عن مقالات منشورة حديثاً على فيسبوك
بتتكلم عن تجربة باستخدام جهاز شبيه لـ CERN من حيث طريقة عمله من خلال عكس العملية الفيزيائية محل الاختبار لكن الهدف مختلف تماماً
وإن كان كله بيحوم حول الرغبة في معرفة الأصل
أصل الكون

الجهاز لمشروع اسمه مشروع AINTA وهو اختصار لـ Antarctic Impulsive Transient Antenna

والتفاصيل كالتالي:


https://www.facebook.com/mahmoud.dafire ... 6899289735

تخيل لو أنا دلوقتي جيت وقلتلك إرمي كل حاجة تعرفها عن نشأة الكون ومفهوم الوقت والزمن نفسه في الزبالة، لإن في فرضية جديدة لسه طالعة من فيزيائيين بتناقض كل ده، وبتقولك إن في كون مختلف عن الكون بتاعنا، الزمن فيه بيمشي بالعكس، بالضبط زي فيلم Tenet بتاع كريستوفر نولان!!
ومش بس كده.. ده الكون ده المفروض إنه سبق وجود الإنفجار الكبير أصلًا، وكمان الفرضية دي ممكن تحل واحدة من أكبر ألغاز الفيزياء الحديثة، اللي لحد النهارده مش لاقيينلها أي إجابة.. لغز المادة المظلمة Dark Matter!

كوباية شايك الحلوة والنعناع ، ويالا بينا..
***
بص يا سيدي.. الموضوع كله بدأ مع ورقة بحثية جديدة اتنشرت من فترة في الدورية العلمية Annals of Physics من فريق عالمي من علماء الفيزياء النظرية..

الورقة دي بقى كانت بتقول حاجات غريبة أوي، تخلي دماغك تلف، وممكن تخليك تتسائل عن معنى العالم اللي أنت عايش فيه كله..

الفرضية بتاعتهم دي مبدئيًا كانت بتتكلم عن حاجة في علوم الفيزياء إسمها تناظر الـ CPT، أو الـ CPT Symmetry..

دي يا سيدي المفروض إنها واحدة من قواعد علم الفيزياء الأساسية، بتقول إن الكون نفسه على المستوى الذري، بيكون فيه نوع من التناظر أو التماثل في 3 حاجات رئيسيين.. الحاجات دي هي (الشحنة Charge)، و(التكافؤ Parity)، و(الزمن Time)..

طب يعني أيه يا علام؟.. هقولك..

التناظر في الشحنة ده بيبقى معناه إن انت دلوقتي لو جيت في خلال أي تفاعل ذري، وعكست الشحنة بتاعت الجسيم الذري الداخل في التفاعل ده، فناتج التفاعل هيكون هو هو بالضبط، لكن بالعكس..

وتناظر التكافؤ أو ال Parity ده معناه إنك لو بصيت على التفاعل الذري المعكوس بتاع الجسيم الذري اللي اتكلمنا عنه ده، فهو شكله هيكون مماثل تمامًا للتفاعل الذري الأصلي، بدون أي فرق!

وأخيرًا، تناظر الوقت أو الـ Time Symmetry ده بيقول إنك لو بصيت على التفاعل الذري ده وهو بيحصل، وبعدين عكست الزمن وخليته يحصل بالعكس، كإنك بترجع الفيديو لورا، فهو بردو شكله هيكون مماثل تمامًا للأصلي، ومش هتقدر تفرق ما بينهم..

وكل التناظرات والتماثلات دي بقى، موجودة بشكل حقيقي، وبتتوازن مع الأصل بتاعها، عشان تدي للكون شكله المعروف.. يعني موجود فعلًا مادة مضادة Anti-Matter شحنتها معكوسة، وموجود بالفعل تفاعلات ذرية بتحصل بالعكس وبتمشي عكس الزمن، زي تفاعلات النيوترينو Neutrino على سبيل المثال.. وهبقى أكلمك عنهم في مقال جاي..

طيب حلو أوي..

التناظرات دي بقى يا سيدي المفروض إنها من أساسيات علوم الفيزياء، وبيتعامل معاها الفيزيائيين في العالم كله دايمًا لما بيحاولوا يحسبوا ناتج أي عملية ذرية أو تفاعل ذري..

بس اللي بيقوله بقى العلماء اللي نشروا الورقة البحثية اللي بنتكلم عنها دي، هو إن التناظر الفائق الموجود في التفاعلات الذرية ده، مش موجود في الحاجات الذرية الصغيرة دي بس.. لأ..

ده التناظر ده في الواقع يمكن تطبيقه على طريقة عمل الكون كله، بشكله وحجمه الحقيقي الضخم!

بمعنى إنهم بيقولوا إن في كون تاني كامل، بيكمل الكون العادي بتاعنا، لكن هو معكوس عشان يقدر يتوازن معاه!!..

وكل حاجة في الكون التاني ده بتمشي بالمقلوب..

الجسيمات الذرية شحناتها معكوسة..

الوقت فيه بيمشي بالمقلوب، وبيرجع من المستقبل للماضي مش العكس..

كإنه بالضبط صورة معكوسة أو Mirrored Image من الكون بتاعنا، حسب التعبير العلمي اللي هما استعملوه!!


وخد بقى التقيلة..

الكون ده مش كون موازي بالمعنى المفهوم لينا دلوقتي.. لأ خالص.. الكون ده المفروض إنه موجود على خط الزمن، في منطقة تسبق حدوث الإنفجار الكبير The Big Bang نفسه!

بمعنى إن الإنفجار الكبير مكانش إنفجار كبير بالمعنى المفهوم.. لأ ده كان في كون قبله بدأ من نهاية الزمن، وبعدين فضل يرجع لورا لحد ما وصل لنقطة الصفر، وبعدها الزمن نفسه بدأ يمشي بالمقلوب، ومنه اتكون الكون بتاعنا اللي احنا بنشوف فيه معدل مرور الزمن من الماضي والحاضر للمستقبل!!

لو مش فاهم لسه ومش مستوعب، فخليني أقولك إن اللي بيقوله العلماء دول هو إن الكون بتاعنا الطبيعي موجود معاه كون تاني مماثل ليه في كل شيء، لكن معكوس، وكل حاجة فيه بتمشي بالعكس حتى الزمن.. والكون ده اللي بيفصل بيننا وبينه هو الإنفجار الكبير نفسه..

يعني لو رجعنا بالزمن لما قبل الإنفجار الكبير، فإحنا هنشوف الكون ده، وهنبقى شايفين فيه الفضاء والأجرام السماوية سواء النجوم أو الكواكب، بتتحرك بالعكس، وبتتجمع تاني بدل ما تنفجر..

هنشوف مثلًا الثقوب السوداء وهي بتطرد الأجسام لخارج حدودها، بدل ما تجذبهم ليها وتبتلعهم.. بالضبط زي مفهوم الثقوب البيضاء White Holes، اللي كتير من علماء الفيزياء كانوا بيفترضوا وجودها ومش قادرين يرصدوها..

اتضح إن مفيش حد قادر يشوفها عشان هي في الواقع بعيدة أوي عننا لدرجة إن موقعها في الزمن أبعد من الإنفجار الكبير نفسه، اللي المفروض إنه حصل من 13.8 مليار سنة!

أنت متخيل مدى خيالية الفكرة، وعظمتها اللي ممكن تخلي دماغك وعقلك نفسه يسيح؟!

والأدهى بقى، إن النظرية دي ممكن تحل اللغز اللي كان مجنن علماء الفيزياء كله في العالم بقاله سنين طويلة، اللي هو لغز المادة المظلمة Dark Matter..

ولو مش عارف أيه المادة المظلمة دي، فخليني باختصار أقولك إنها المفروض مادة موجودة في كل حتة من الكون، سواء جوه المجرات أو خارجها، بس مش مرئية لينا خالص!!.. مبنقدرش نشوفها، لكن بنقدر نحس بوجودها بسبب إنها بتتفاعل مع باقي مكونات الكون من خلال حاجة واحدة بس، هي الجاذبية..

مادة لا تصدر ضوء ولا تتفاعل ذريًا مع أي شيء آخر حواليها، وكل اللي بيدلنا على إنها موجودة هو كتلتها الثقيلة اللي بتشكل حوالي 27% من حجم الكون كله!..

علمًا بإن المادة الطبيعية اللي احنا نعرفها وبنشوفها في الفضاء دي، هي أقل من 5% فقط!!.. وباقي الـ 100% هو طاقة مظلمة Dark Energy..

المهم بقى إن المادة المظلمة دي بوصفها ده، تطابق بشكل تام مادة تانية تم افتراضها بناءً على الورقة البحثية الجديدة دي، إسمها الـ Right handed Neutrinos!!

المفروض في الفيزياء اللي احنا نعرفها في الكون بتاعنا، في جسيمات ذرية إسمها جسيمات النيوترينو..

كل الجسيمات دي بقى بتكون حركتها الذرية الطبيعية اللي احنا بنقيسها، من الشمال لليمين..

أو زي ما بيسموها Left handed Neutrinos.. والمشكلة في ده زمان كانت إن الجسيمات دي تعتبر الجسيمات الوحيدة اللي بتناقض قانون التناظر الفائق أو الـ CPT Symmetry ده، لإننا ما لقيناش أي جسيمات أخرى معكوسة منها بتدور من اليمين للشمال!!..

وده طبعًا كان شيء غريب، لإن التناظر ده المفروض إنه يكون متطبق على كل الجسيمات الذرية.. وهو بالفعل موجود في كل الجسيمات التانية إلا النيوترينو ده.. وعشان كده كان بيتم اعتبار إن القاعدة دي قاعدة غير كاملة، وليها استثناء وحيد..

بس بكده بقى، ممكن ميكونش في استثناء ولا حاجة، وممكن تكون الجسيمات المعكوسة بتاعت النيوترينو دي موجودة فعلًا، بس موجودة في كون مختلف عن الكون بتاعنا، لكنه موجود معاه على نفس الخط الزمني.. والجسيمات دي لو صح وجودها، فهي مش هتقدر تتفاعل مع الكون بتاعنا خالص بأي شكل معروف، إلا -فقط- من خلال الجاذبية!!

بالضبط زي المادة المظلمة الغامضة اللي بقالنا سنين مش لاقيينها ولا لاقيين أي إجابة ليها!!

عايز أقولك إن الفرضية العلمية دي قالبة المجتمع العلمي كله رأسًا على عقب دلوقتي، وجميع مختبرات الأبحاث الكبرى اللي زي CERN وFermiLab بيسعوا لتأكيدها من خلال تجارب التصادمات الذرية دي.. عشان لو لقوا فعلًا النيوترينو المعكوس ده، وقدروا يرصدوه، فده هيكون معناه إن كل اللي كنا فاكرين إننا كنا نعرفه عن الكون هيتضرب في مقتل!!

معنى كده إن هيكون في كون تاني مختلف تمامًا، جسمك فيه بيصغر مع مرور الوقت، مش بيكبر!!

والمفاجأة الأكبر إن في تجربة حصلت من بتاع سنتين كده، في القطب الجنوبي، بيقولوا فيها إنهم لقوا فعلًا النيوترينو المعكوس ده!!..

بس بإذن الله هحكيلك عنها بكره في مقال منفصل، هي وجميع الإفتراضات المذهلة اللي ممكن تتكون بناءً على الكشوفات الجديدة دي..

ولحد وقتها، تقدر تدخل على الورقة العلمية اللي نشرها العلماء دول وتقرأها من هنا لو عايز: https://arxiv.org/abs/1803.08930

ودي شوية مصادر تقدر تقرأ منها تفاصيل أكتر:
https://www.livescience.com/mirror-univ ... ins-dark...
https://futurism.com/anti-universe-time-backwards
https://www.popularmechanics.com/.../anti-universe.../

_________________
"يس" يا روح الفؤاد


أعلى
 يشاهد الملف الشخصي  
 
 عنوان المشاركة: Re: الرجوع في الزمن
مشاركة غير مقروءةمرسل: الثلاثاء مايو 10, 2022 9:36 am 
غير متصل

اشترك في: السبت فبراير 06, 2010 8:26 pm
مشاركات: 13609
مكان: مصر
المقال الثاني:

https://www.facebook.com/mahmoud.dafire ... 9495704142

إمبارح كنا اتكلمنا عن فرضية فيزيائية جديدة بتقول إن في كون معكوس الزمن فيه بيمشي بالعكس، وكل حاجة فيه هي صورة معكوسة تمامًا من الكون بتاعنا، كإنك بتبص عليه من مراية.. وإن في جسيم افتراضي في النظرية دي، ممكن لو اكتشفنا وجوده إننا نحل لغز المادة المظلمة اللي محير علماء الفيزياء بقاله عشرات السنين..
الكلام ده كلنا كنا فاكرين انه افتراض، بس تعرف إن في تجربة فيزيائية حقيقية قدمت دليل على إننا اكتشفنا بالفعل الكون ده، عشان إحنا قدرنا نرصد جسيم ذري شكله وحركته يبدو عليها إنه بيتحرك لورا في الزمن، وبيتفاعل مع خط الوقت في العالم بتاعنا؛ بالعكس؟
فتحلي مخك بقى، وتعالى معايا أحكيلك عن التجربة المذهلة دي، عشان نشوف مع بعض أيه الإحتمالات المبهرة اللي ممكن نكتشفها منها..

كوباية شايك الحلوة والنعناع ❤ ويالا بينا..
***
لو عايز تفهم أكتر اللي هنتكلم فيه دلوقتي، ممكن تشوف الجزء الأول من المقال ده اللي نزل امبارح، عشان تبقى معانا على الخط:
https://m.facebook.com/story.php?story_ ... 2104278915
***
بص يا سيدي.. في شهر مايو من سنة 2020، وكالة ناسا N.A.S.A الأمريكية لأبحاث الفضاء أعلنت عن اكتشاف جديد عمله فريق من علماء الفيزياء في القارة القطبية الجنوبية، كان من شأنه إنه يغير كل مفاهيمنا الحالية عن الكون والعالم والفضاء وعلم الفيزياء نفسه..

والإكتشاف ده عمله جهاز إسمه (أنيتا ANITA)، اللي هو اختصار لجملة (هوائي انتاركتيكا الدافع العابر Antarctic Impulsive Transient Antenna)

وده يا صديقي عبارة عن جهاز بيستعمله العلماء دول للبحث عن جسيمات ذرية وكمية متناهية الصغر، إسمها جسيمات النيوترينو Neutrinos.. والنيوترينو دي باختصار هي عبارة عن جسيمات ذرية متعادلة الشحنة، اتكونت من زماااااان أوي في وقت الإنفجار الكبير Big Bang، ومازالت لحد دلوقتي بتتكون وبتنشأ من التفاعلات الذرية عالية الطاقة High Energy، اللي هي بتحصل في قلب النجوم أو مراكز المجرات أو على حدود الثقوب السوداء مثلًا.. والجسيمات دي موجودة ومالية كل ركن في الكون حرفيًا..

مثلًا، الشمس نفسها بتكون جسيمات النيوترينو بقدر لا يمكن استيعابه.. وبسبب كون الجسيمات دي متعادلة الشحنة، وشديدة الصغر، ف هي مبتتأثرش بقوى الطبيعة أو قوى الفيزياء الأربعة تقريبًا.. يعني مبتتأثرش بالقوة الكهرومغناطيسية Electromagnetic Force بسبب تعادل شحنتها، ولا بقوة التفاعل النووي القوي أو التفاعل النووي الضعيف Strong and Weak nuclear interaction.. حتى تأثرها بالجاضبية بيكون محدود جدًا، لإن الجاذبية تأثيرها ضعيف جدًا جدًا على المستوى الذري..

يعني الخلاصة إنها جسيمات رايقة وفي حالها، مبتتأثرش بأي قوى فيزيائية تقريبًا.. وخليني أقولك معلومة تانية أكثر إبهارًا.. أنت وانت قاعد دلوقتي بتقرا مثلًا، في أكتر من 65 مليار نيوترينو بيعدوا من خلال جسمك في كل لحظة من غير ما تحس!!
لكن الفكرة بقى إن في جسيمات نيوترينو تانية بتكون طاقتها عالية شوية.. والجسيمات دي مبتقدرش تعدي من خلال الأجرام السماوية الضخمة اللي زي كوكب الارض مثلًا.. وده عشان هي طاقتها أكبر بملايين المرات من طاقة أي جسيمات إحنا نعرفها هنا على الأرض.. ف عشان كده مبتقدرش تعدي من خلال كتلة الأرض الصلبة..

حلو لحد كده؟!.. تمام..

جهاز أنيتا ANITA اللي كلمتك عنه ده بقى هو عبارة عن حاجة عاملة زي الرادار كده.. بيستعملوه للكشف عن جسيمات النيوترينو عالية الطاقة High Energy Particles اللي قلنا عليها دي، في القطب الجنوبي.. هييجي حد يسألني طب ليه القطب الجنوبي؟!.. ده يا عزيزي القاريء بسبب إن القطب الجنوبي مفيهوش حضارة بشرية تقريبًا.. فبالتالي مفيش أي أجهزة أو حاجات تقدر تأثر على قدرة الجهاز على الكشف وإلتقاط الجسيمات دي.. يعني قارة أنتاركتيكا أو القارة القطبية الجنوبية دي حرفيًا عاملة زي ما تكون موجودة على كوكب تاني.. مفيهاش تلوث أو أي إشعاعات ممكن تأثر على عمل الأجهزة الحساسة دي..
طيب ايه اللي حصل بقى سنة 2020؟!!

اللي حصل يا سيدي هو إن وقتها طلع علماء مشروع ANITA دول، وأعلنوا إنهم قدروا يوصلوا لنيوترينو بيرجع لورا في الزمن!!

عشان تفهم، هشرحلك ببساطة..

اللي عمله العلماء دول بالضبط، هو إنهم جابوا منطاد صغير، أو زي بالونة كده مليانة هوا سخن، وحطوا فيها الجهاز، وطيروه لفوق في السماء.. والسبب هو إنهم شايفين إن على الإرتفاع ده، مش هيكون في أي تأثير لأي موجات راديو أو أي نوع من الموجات على دقة نتائجهم..

طيب جميل..

بعد ما طيروا البالونة وجواها الجهاز، إبتدوا يكتشفوا جسيمات نيوترينو عالية الطاقة عادي جاية من الفضاء..

لحد كده مفيش مشكلة..

عشان معروف ان جسيمات النيوترينو عالية الطاقة دي -(بيسموها تاو نيوتريتو Tau Neutrino بسبب كبر حجمها وطاقتها عن الجسيمات الأخرى)- هتبقى جاية من الفضاء من كل مكان.. ومش هتتفاعل مع أي حاجة بسبب تعادل شحنتها زي ما قلنا..

بس الجسم الصلب Solid Matter بتاع كوكبنا هو الحاجة الوحيدة اللي هتقدر توقفها بسبب طاقتها وحجمها الكبير دول زي ما قلنا..

يعني الطبيعي إنهم يكتشفوا إن جسيمات تاو نيوترينو Tau Neutrinos دي وهي جاية من (فوق Up).. يعني جاية من الفضاء نفسه.. ده طبيعي جدًا وهو المتوقع..

لكن اللي مش طبيعي بقى إنهم إكتشفوا جسيمات تاو نيوترينو جاية من الأرض نفسها!!

مش زي ما اتفقنا، جسيمات تاو نيوترينو مش هتقدر تعبر من الأرض أصلًا.. لإن الأرض بتمتصها تمامًا لداخلها؟!.. يعني بالتالي كون إنك ترصد تاو نيوترينو راجع من الأرض للفضاء، ده معناه معجزة.. كإنك بالظبط شفت واحد ميت بيصحى تاني!!


طب إزاي؟!

العلماء دول قعدوا يعيدوا ويزيدوا في التجربة، يمكن تكون غلطة في النتايج.. ودي حاحة ممكن تحصل مرة كل مليار مرة مثلًا.. يعني مستحيلة.. بس هما قعدوا يجربوا بردو، ولقطوا نفس الجسيمات دي أكتر من مرة.. في الواقع لقطوها عدد كبير جدًا من المرات، بينفي تمامًا إنها ممكن تكون غلطة أو خلل في الجهاز!!

وده مكانش له غير معنى واحد بس، بعد استبعاد كل المستحيلات، والبحث عن الحقيقة الأكثر غرابة والأكثر أناقة زي ما قال سير أرثر كونان دويل على لسان شيرلوك هولمز زمان..

المعنى ده والحقيقة دي هو إن الجسيمات دي في الواقع كانت بتمشي عكس الزمن نفسه!!

يعني هي مش خبطت في الأرض وردت تاني -عشان ده مستحيل- بل هي في الواقع بترجع في الزمن من الأرض للفضاء!

يعني جسيمات النيوترينو الغريبة دي في الواقع جاية من مكان خارج الكون بتاعنا نفسه!!! جاية من كون تاني الزمن فيه بيمشي بالعكس.. بدل ما هو بيمشي لقدام، لأ هو بيمشي لورا..

كون تاني، فيه كل قوانين الطبيعة والفيزياء بتشتغل بالعكس.. يعني مثلًا الجاذبية فيه بتزقك لبعيد عن الأجرام السماوية الكبيرة، مش بتشدك ليها..

مثلًا، الجسيمات والكواكب والنحوم، وحتى الكائنات الحية باعتبار إن فيه كائنات حية يعني، لو إحنا قدرنا نشوفهم من موقعنا في الكون بتاعنا، هيبقى شكلهم وشكل حركتهم قدامنا بالضبط زي فيلم TENET بتاع كريستوفر نولان كده.. بيتحركوا لورا وماشيين في الزمن بالعكس، وأجسامهم بتصغر مش بتكبر!!.. بالضبط زي ما العلماء بتوع نظرية الكون المعكوس اللي اتكلمنا عنهم امبارح، كانوا بيقولوا في الورقة البحثية بتاعتهم!

أنت فاهم معنى اللي بقوله أو متخيله؟!!

الفكرة بقى إنهم أصلًا اكتشفوا الموضوع بالصدفة من كتر ما هما كانوا مش متخيلينه..

كذا مرة الجهاز يلقط حاجة وهما ينفضولها باعتبارها مجرد ضوضاء استاتيكية.. لحد ما قرروا يدوروا، ولقوا النتيجة دي، من دراسة لضوضاء التقطها الجهاز سنة 2016!..

والضوضاء دي حاولوا إنهم يلاقولها تفسير، وقالوا انه ممكن النيوترينو ده مثلا يكون اتحول لنوع تاني من الجسيمات من خلال أي تفاعل من أي نوع، خلاه يقدر يعبر من كتلة الأرض، وبعدين يرجع لكونه نيوترينو تاني، بس بعد كده أكدوا خطأ الإفتراض ده لإنه مستحيل يحصل إلا مرة من وسط كل مليار مليار مرة.. وحتى لو حصل، مش هيتكرر بالكثرة دي!

طب ده معناه ايه؟!

معناه إن ممكن جدًا يكون الإفتراض بتاع الكون المعكوس اللي بيقولك إنه مع بداية تكون الكون بتاعنا، إتكون معاه كون تاني معكوس تمامًا، بيحتل نفس المساحة المادية بتاعت الكون بتاعنا إحنا، لكن مبنقدرش نشوفه عشان هو كون معكوس، يطلع حقيقي ومش خيال علمي، ولا مجرد افتراضات نظرية على الورق!

وده بردو معناه إن إفتراضات العالم العظيم وأحد مكتشفي فيزياء وميكانيكا الكم Quantum Mechanics، إروين شرودنجر Erwin Schrodinger، لما كان بيتكلم سنة 1952 عن الأكوان المتوازية في افتراضات ميكانيكا الكم، وقال إننا عايشين في كون متعدد Multiverse يحوي ملايين الأكوان المتوازية المختلفة عنا في الخصائص والقوانين الفيزيائية نفسها، واللي بعدها هو نفسه قال عليها إنها فرضية (مجنونة Lunatic)، ومحدش كان لاقي عليها أي دليل فعلي؛ جايز وممكن بناءً على المشاهدات دي، إنها تطلع بجد ومش جنون ولا مجرد شطحات علمية!

الفكرة بقى إن وكالة ناسا بعد ما أعلنوا عن الإكتشاف ده بفترة، حاولوا إنهم يبدوا متحفظين شوية في كلامهم، ويقولوا إن الإكتشاف ده لا يؤكد إننا لقينا كون معكوس فعلًا، بل ممكن يكون التفسير مختلف..

والحقيقة إن فعلًا في تفسيرات تانية كتير، لكنها كلها فيها مشاكل.. وفي رأيي الشخصي؛ التفسير اللي بيقول إننا قدرنا لأول مرة نشوف الـ Right Handed Neutrino وهو بيتحرك في الزمن بالعكس هو الأقرب للواقع.. وده عشان هو بيحل كمان لغز الطاقة المظلمة Dark Matter، زي ما قلنا في المقال اللي فات..

طب في سؤال.. هو دلوقتي الكون المعكوس ده لو افترضنا إنه ممكن يبقى حقيقي.. إزاي ممكن يبقى شكل الحياة فيه؟!.. ويا ترى لو احنا قدرنا نشوفه بشكل واقعي، هل ممكن يكون في بيننا أي تفاعل أو تداخل، أو أي Interaction من أي نوع؟

يعني هل ممكن في يوم إننا نتعامل مع الكون الآخر ده بشكل حقيقي؟!.. ولو ده حصل، وصحينا الصبح لقينا إننا بنقدر نشوف الكون ده وندخله بعقولنا، يا ترى التجربة المذهلة والمرعبة دي ممكن يبقى شكلها عامل إزاي؟!.. وأيه رأي النصوص الدينية في الإفتراضات بتاعت الكون المعكوس ده، وهل هي بتؤيدها ولا بتناقضها؟

كل ده هنتكلم عنه بكره في الجزء الثالث من المقال ده، وهنتطرق لمواضيع أغرب من الخيال حرفيًا.. ولحد وقتها، لو السلسلة دي عجبتك ودفعت عقلك للتفكير والتأمل، متنساش تعمل منشن لصحابك وحبايبك المهتمين بالمواضيع دي عشان يقرأوا معك، وشير للمقال عشان يوصل لغيرك.. واعمل فولو وسي فيرست عشان يوصلك باقي المحتوى أول بأول..

ودي بعض المصادر اللي ممكن تفهم منها أكثر:
https://www.livescience.com/truth-behind-nasa-mirror...
https://futurism.com/anti-universe-time-backwards
https://www.popularmechanics.com/.../anti-universe.../
https://www.dailystar.co.uk/.../nasa-sc ... s-detect...
شكرًا.
#علام

_________________
"يس" يا روح الفؤاد


أعلى
 يشاهد الملف الشخصي  
 
 عنوان المشاركة: Re: الرجوع في الزمن
مشاركة غير مقروءةمرسل: الخميس مايو 19, 2022 11:38 am 
غير متصل

اشترك في: الخميس مارس 29, 2012 9:53 pm
مشاركات: 45682

بسم الله والحمد لله والصلاة والسلام على سيدنا رسول الله .. وبعد

يمكن الرجوع بالزمن معمليا الى الوراء وذلك بعد ان تمكن العلماء الروس من كسر اقانون الثانى للديناميكا الحراريه

فمختبريا، وعلى مستوى كمي بالغ الضآلة، تمكن علماء من إرجاع الزمن إلى الوراء جزءا من ثانية.

النظر الروابط التاليه :-

https://www.alhurra.com/choice-alhurra/ ... 9%85%D9%86

https://www.light-dark.net/amp/post.php?id=1448851

على الرغم من ان تاسا وجهات بحثيه اخرى شككوا وثالوا ان حدث فهو يحدث من ناحيه الغيزياء النظريه فقط

انطر الرابط https://nasainarabic.net/main/articles/ ... ntum-world
ولذلك يمكن للإنسان أن يرى أعماله الماضية ولكنه لا يستطيع أن يغيرها!

وسبحان الله! يأتي القرآن ليتحدث بكل دقة عن هذه الحقيقة فيقول:-

(وَوَجَدُوا مَا عَمِلُوا حَاضِرًا) أي أن كل إنسان سوف يرى أعماله وكأنها تحدث في اللحظة الحاضرة، ولكنه لا يستطيع أن يغيرها،

وهذا ما يقوله العلماء اليوم عندما يتحدثون عن السفر إلى الماضي، بأن الإنسان يستطيع أن يرى الماضي ولكنه لا يستطيع أن يغيره!

ويجب الاشاره هنا الى هنالك أمر مهم في النظرية النسبية وهو أن أي حادثة تحدث الآن لا يمكن أن نراها بنفس اللحظة، إنما تستغرق زمناً

يتعلق ببعدها عنا. فإذا انفجر نجم يبعد عن الأرض ألف سنة ضوئية، إذا انفجر الآن سوف لن نرى هذا الانفجار إلا بعد ألف سنة،

وهي المدة اللازمة للضوء ليقطعها من النجم إلى الأرض.

وحتى نرى اللحظة الحالية يجب أن نسير بسرعة الضوء، أما إذا أردنا أن يعكس الزمن اتجاهه فما علينا إلا أن نسير بسرعة أكبر من سرعة الضوء

لنرى الماضي!

والقراّن يحدثنا فى هذه الأزمنة الثلاثة بنفس اللحظة، ولذلك نجد القرآن غالباً ما يتحدث عن المستقبل بصيغة الماضي!

ومن أمثلة ذلك قوله تعالى:-

(وَأُزْلِفَتِ الْجَنَّةُ لِلْمُتَّقِينَ * وَبُرِّزَتِ الْجَحِيمُ لِلْغَاوِينَ * وَقِيلَ لَهُمْ أَيْنَ مَا كُنْتُمْ تَعْبُدُونَ) [الشعراء: 90-92].

ومع أن الآيات تتحدث عن يوم القيامة أي عن الزمن المستقبل، إلا أنها جاءت على صيغة الماضي: (أُزْلِفَتِ، بُرِّزَتِ، قِيلَ).

هذا الكلام لا يعني أن الناس سيسيرون بسرعة أكبر من سرعة الضوء يوم القيامة حتى يروا أعمالهم الماضية،

إنما سيكون ليوم القيامة قوانينه الخاصة والتي لا ندركها، ولكننا نؤكد أن تحقيق هذا الأمر من الناحية العلمية ممكن.

والدليل على أن يوم القيامة له قوانينه التي تختلف عن قوانين الدنيا قول الحق تعالى: -

(يَوْمَ تُبَدَّلُ الْأَرْضُ غَيْرَ الْأَرْضِ وَالسَّمَوَاتُ وَبَرَزُوا لِلَّهِ الْوَاحِدِ الْقَهَّارِ) [إبراهيم: 48]. ويقول أيضاً: -

(لَقَدْ كُنْتَ فِي غَفْلَةٍ مِنْ هَذَا فَكَشَفْنَا عَنْكَ غِطَاءَكَ فَبَصَرُكَ الْيَوْمَ حَدِيدٌ) [ق: 22].

والله تعالى اعلى وأعلم




_________________
أستغفر الله العلى العظيم الذى لا اله الاّ هو الحى القيوم وأتوب اليه
أستغفر الله العلى العظيم الذى لا اله الاّ هو الحى القيوم وأتوب اليه
أستغفر الله العلى العظيم الذى لا اله الاّ هو الحى القيوم وأتوب اليه


أعلى
 يشاهد الملف الشخصي  
 
 عنوان المشاركة: Re: الرجوع في الزمن
مشاركة غير مقروءةمرسل: الخميس مايو 19, 2022 3:52 pm 
غير متصل

اشترك في: الخميس يونيو 14, 2007 2:19 pm
مشاركات: 5740
حامد الديب كتب:
ولذلك يمكن للإنسان أن يرى أعماله الماضية ولكنه لا يستطيع أن يغيرها!


يا سلام على الكلام .. جزاكم الله خيرا يا دكتور حامد والله

_________________
ومن دخل حصن النبي صلى الله عليه وآله وسلم لا يضام


أعلى
 يشاهد الملف الشخصي  
 
 عنوان المشاركة: Re: الرجوع في الزمن
مشاركة غير مقروءةمرسل: الخميس مايو 26, 2022 1:50 am 
غير متصل

اشترك في: الخميس مارس 29, 2012 9:53 pm
مشاركات: 45682

جزاكم الله خيرا الفاضل محب مولانا الحسين

رضى الله تعالى عن مولانا الامام الحسين وارضاه

انظر اخى الجديد فى هذا الخبر الطازه

روسيا..علماء الفيزياء يكتشفون طريقة لإبطاء الضوء ملايين المرات

https://arabic.rt.com/technology/135716 ... %A7%D8%AA/
ولمّا الضوء تبقى سرعته صفر او اقل ...ايه اللى حيحصل ؟؟؟؟؟؟

اسرح بخيالك وشوف ممكن يحصل ايه ؟؟؟؟



_________________
أستغفر الله العلى العظيم الذى لا اله الاّ هو الحى القيوم وأتوب اليه
أستغفر الله العلى العظيم الذى لا اله الاّ هو الحى القيوم وأتوب اليه
أستغفر الله العلى العظيم الذى لا اله الاّ هو الحى القيوم وأتوب اليه


أعلى
 يشاهد الملف الشخصي  
 
 عنوان المشاركة: Re: الرجوع في الزمن
مشاركة غير مقروءةمرسل: الجمعة مايو 27, 2022 9:49 pm 
غير متصل
Site Admin

اشترك في: الاثنين فبراير 16, 2004 6:05 pm
مشاركات: 23595

بارك الله في دكتورنا الغالي دكتور حامد

سرعة معينة تساوي تباطوء معين

والسرعة صفر تساوي سرعة فائقة جدا مقدارها يعلمها الله ...

_________________
عَنْ عَلِيٍّ قَالَ كُنَّا إِذَا احْمَرَّ الْبَأْسُ وَلَقِيَ الْقَوْمُ الْقَوْمَ اتَّقَيْنَا بِرَسُولِ اللهِ صلى الله عليه وسلم فَمَا يَكُونُ مِنَّا أَحَدٌ أَدْنَى إِلَى الْعَدُوِّ مِنْهُ


أعلى
 يشاهد الملف الشخصي  
 
 عنوان المشاركة: Re: الرجوع في الزمن
مشاركة غير مقروءةمرسل: الجمعة مايو 27, 2022 9:55 pm 
غير متصل

اشترك في: السبت فبراير 06, 2010 8:26 pm
مشاركات: 13609
مكان: مصر
بارك الله في جميع السادة الأفاضل وشكرا على اثراء الموضوع، شرفني مروركم الجميل

_________________
"يس" يا روح الفؤاد


أعلى
 يشاهد الملف الشخصي  
 
 عنوان المشاركة: Re: الرجوع في الزمن
مشاركة غير مقروءةمرسل: الجمعة مايو 27, 2022 9:59 pm 
غير متصل

اشترك في: الأربعاء يناير 02, 2013 5:01 pm
مشاركات: 10843
msobieh كتب:

بارك الله في دكتورنا الغالي دكتور حامد

سرعة معينة تساوي تباطوء معين

والسرعة صفر تساوي سرعة فائقة جدا مقدارها يعلمها الله ...

_________________
أيا ساقيا على غرة أتى
يُحدثني وبالري يملؤني ،
فهلا ترفقت بى ،
فمازلت في دهشة الوصف
ابحث عن وصف لما ذُقته ....

                         
                 
              


أعلى
 يشاهد الملف الشخصي  
 
 عنوان المشاركة: Re: الرجوع في الزمن
مشاركة غير مقروءةمرسل: الجمعة مايو 27, 2022 10:17 pm 
غير متصل
Site Admin

اشترك في: الاثنين فبراير 16, 2004 6:05 pm
مشاركات: 23595

أكرمك الله الفاضلة خلف الظلال

موضوع ممتع ..

_________________
عَنْ عَلِيٍّ قَالَ كُنَّا إِذَا احْمَرَّ الْبَأْسُ وَلَقِيَ الْقَوْمُ الْقَوْمَ اتَّقَيْنَا بِرَسُولِ اللهِ صلى الله عليه وسلم فَمَا يَكُونُ مِنَّا أَحَدٌ أَدْنَى إِلَى الْعَدُوِّ مِنْهُ


أعلى
 يشاهد الملف الشخصي  
 
 عنوان المشاركة: Re: الرجوع في الزمن
مشاركة غير مقروءةمرسل: الجمعة مايو 27, 2022 10:21 pm 
غير متصل

اشترك في: السبت فبراير 06, 2010 8:26 pm
مشاركات: 13609
مكان: مصر
msobieh كتب:

أكرمك الله الفاضلة خلف الظلال

موضوع ممتع ..


متعكم الله سيدنا الكريم بالصحة والعافية

_________________
"يس" يا روح الفؤاد


أعلى
 يشاهد الملف الشخصي  
 
 عنوان المشاركة: Re: الرجوع في الزمن
مشاركة غير مقروءةمرسل: الجمعة مايو 27, 2022 10:53 pm 
غير متصل

اشترك في: الخميس مارس 29, 2012 9:53 pm
مشاركات: 45682
وجزاكم الله كل الوان الخير مولانا الصبيح

_________________
أستغفر الله العلى العظيم الذى لا اله الاّ هو الحى القيوم وأتوب اليه
أستغفر الله العلى العظيم الذى لا اله الاّ هو الحى القيوم وأتوب اليه
أستغفر الله العلى العظيم الذى لا اله الاّ هو الحى القيوم وأتوب اليه


أعلى
 يشاهد الملف الشخصي  
 
عرض مشاركات سابقة منذ:  مرتبة بواسطة  
إرسال موضوع جديد الرد على الموضوع  [ 11 مشاركة ] 

جميع الأوقات تستخدم GMT + ساعتين


الموجودون الآن

المستخدمون المتصفحون لهذا المنتدى: لا يوجد أعضاء مسجلين متصلين و 36 زائر/زوار


لا تستطيع كتابة مواضيع جديدة في هذا المنتدى
لا تستطيع كتابة ردود في هذا المنتدى
لا تستطيع تعديل مشاركاتك في هذا المنتدى
لا تستطيع حذف مشاركاتك في هذا المنتدى
لا تستطيع إرفاق ملف في هذا المنتدى

البحث عن:
الانتقال الى:  
© 2011 www.msobieh.com

جميع المواضيع والآراء والتعليقات والردود والصور المنشورة في المنتديات تعبر عن رأي أصحابها فقط