ايقاف المساعدات الامريكيه و حرب تكسير العظام
ا----------------------------------------------
.
من كام يوم اعلن الكونجرس الامريكي ايقاف جزء من المعونة الاقتصادية الامريكية لمصر ، و تخفيضها الى النصف ...... و كالعادة و زى كل مرة ... و لانهم ما بيزهقوش .... أو بالأصح إن دي هي الحاجة الوحيدة اللى يقدروا يعملوها لقلة حيلتهم و فشلهم في مهمة تفكيك الدولة المصرية ... أخد الميكروفون على طول المجموعة إياها من الخبراء الاستراتيجيين الاقتصاديين و السياسيين و خبراء حموم الانسان .... و قعدوا يولولوا و ينشروا سمومهم في كل حته بــ نشرهم فيديو لجنة الاستماع في الكونجرس الامريكي اللى كان بــ يناقش أوضاع حموم الانسان في مصر.
.
و مع ان خلاص الناس فهمتهم ... و لأنهم مجموعة من الفشله و الأفاقين اللى بيكذبون كما يتنفسون ..... و مفيش موضوع واحد اتكلموا فيه الا و معدّاش اسبوع بالكتير الا و انكشف كذبهم .... و بقي تأثيرهم صفر .... فإحنا مش هــ نرد عليهم .... لكن زي ما اتعودنا اننا نفهم الصوره بالعقل و المنطق بعد تفكيكها و اعادة تركيب قطع البازل ... تعالوا نتكلم بهدوء ، لأن اللى بــ يفهم بــ يرتاح و يريّح
.
و مع ان اللى بيتقال دلوقتي مش جديد ... و أصدقاؤنا اللى معانا من زمان عرفوا ازاي يحللوا الاخبار دي كويس .... لكن برضوا في الاعادة إفادة
.... و زي ما قولنالكم قبل كدة ، و إتفقنا اننا الفترة اللى داخلين عليها هــ نحتاج مقالاتنا القديمة .... و مع اطلاق صفحة الويب الارشيفية لكل مقالاتنا ... فحيكون سهل جدا علينا نرجع للمقالات و الرسايل اللى بنبعتها ليكم بقالنا اكتر من 4 سنوات .......
فاكرين الهوجة بتاعة ريجيني و الزيطة الكبيره اللى اتعملت لما البرلمان الايطالي اوقف تصدير قطع غيار طائرات الاف 16 لمصر
.... و ازاي اثبت الخبراء الاستراتيجيين وقتها انهم مجموعة من الافاقين الجهلة !!!! ... و عشان مانعيدش الكلام تاني ..... و لأن السياسه بحرها كبيييييير ..... فــ ياريت اللى ماكانش معانا ... يراجع مجموعة المقالات اللى في آخر المقال ده عشان هــ ترتب له افكاره تماما ..
طب ايه بقي الموضوع !!!!! ... شوف يا سيدي ...... المعونة الامريكية بدأت مع تنفيذ اتفاقية السلام مع اسرائيل .... و كانت تنقسم الى جزئين ... معونة عسكرية مقدراها 1.3 مليار دولار ... و معونة اقتصادية مقدارها 850 مليون دولار ... و اللى كان بــ يتم توجيهها لمشاريع البنية التحتيه.
.
المعونة العسكرية فضلت زي ما هي حتي يومنا هذا بقيمة 1.3 مليار دولار ... اما المعونة الاقتصادية فــ بدأت تتقلص حتي وصلت الى 250 مليون دولار عام 2005 ... و اللى بدأت فيه امريكا خطة تنفيذ الخريف العربي بعد الانتخابات الرئاسية في مصر .... فــ قامت بالإعلان عن ان مصر دلوقتي اقتصادياً مش محتاجه المعونه .... و ان بدايةً من 2005 هــ يتم توجيه المعونة دي لتطوير المجتمع المصري و تنمية الديمقراطية و نشر قيم حموم الانسان ... فالمعونة من هنا و رايح هــ تروح لمنظمات المجتمع المدني و تدريب و خلق جيل جديد من الشباب اللى بــ يؤمن بحقوق الانسان و الديمقراطية المهلبية.... و بالفعل بدأنا نشوف تمويلات لجمعيات و منظمات اهلية ، و اللى الناس اكتشفت بنفسها من كام سنة بس انها كانت بتوجه لتنظيمات يسارية تخريبية و لجماعات الاخوان لخلق قاعده وهمية من المثقفين و الاعلاميين و اصحاب الرأي لتكوين نخبة عميلة للغرب هي من ستقود لاحقا المجتمع لتفكيك نفسه بنفسه و هدم الدولة المصرية بأكملها ... و اللى كل ده كان تحت عين الدولة المصرية ساعتها و اللى اتكلمنا عليه بالتفصيل في مقال حتلاقوا اللينك بتاعه في اخر المقال في لينكات المراجع.
.
المهم كان لازم يكون فيه ناس تشتغل من وراء الستار وتقود العملية دي و تمولها ، و يكونوا محطة ارتكاز و توجيه لتنفيذ مخططات التخريب ..... يتحكموا في مفاصل مهمة في الاقتصاد و الاعلام و توجيه المجتمع المصري ... و يتم خلق غطاء كافي ليهم امام الرأي العام ... ممنوع حد يجيب سيرتهم او يتكلم عنهم ... و اللى يجيب سيرة حد فيهم ، او مكانش بيقدم فروض الولاء و الطاعه لهم ، و تنفيذ ما يطلبون ، كان بــ يتم توجيه الاعلام المرئي و المقروء و الالكتروني لاغتياله معنويا ... و كمان كان بيتم اشغال الرأي العام بشخصيات تانيه خالص زي ما كان يطلق عليهم رجال مبارك عشان الناس تسيبهم يشتغلوا و يكملوا مهمتهم في هدوء.
.
الناس دي كان دورها الاساسي هو التحكم في الاعلام الالكتروني و المرئي و المقروء و الاعلام الفني .... عشان يتم خلق نخبة من مجموعة من الفشلة وشواذ الفكر و الفعل و الافاقين و العملاء في مختلف المجالات الادبية و الفنية و الاعلامية ... ويتم تلميعهم ، و خلق بطولات لهم ، او ترسيخ امكانيات وهمية ... فــ تلاقي مثلا واحد جاهل او حرامي او نصاب بقي بقدرة قادر أديب و كاتب قصة او مذيع او سياسي او مفكر اسلامي ..... و بقدرة قادر تلاقي اتعمل مؤتمرات و ندوات و حفلات تكريم و توزيع جوائز عشان يرسخوا في المجتمع ان آراء الناس دي هى الصح و المفروض هم من يقودون الشعب.
.
الناس دي كانت مدعومة تماما من الخارج ... و القيامة تقوم على الدولة لو حد قرّب ليهم ... اتحكموا في مفاصل الحياة المدنية للمجتمع المصري تماماً ... فــ منهم من يتحكم تماما في الاعلام و هو أخطرهم على الاطلاق زي الحاج دياب كده
... و منهم من يتحكم في كل ما يتعلق بـ تكنولوجيا المعلومات و البرمجيات زي مثلا الحاج على فهمى طلبه صاحب راديو شاك و شركة دلتا و كومبيو مي و موبايل شوب .... و منهم من يتحكم في سوق السلع الكهربائية المعمرة ... و منهم من يتحكم في سوق الخضار و الفاكهه ... إلخ ..
و بعد امتصاص الدولة المصرية لآثار المخطط الرهيب لتفتيتها ... و فرضت ارادتها على الجميع دولياً و بدأت تقف علي رجلها إقتصادياً ... كان لازم الدولة تبدأ في تفكيك خط بارليف اللى اتبني داخل المجتمع المصري لتدميره .... فكان الخراب المستعجل عليهم هو إقرار قانون تنظيم عمل منظمات المجتمع المدني ... لأن قبل كده كان الموضوع سداح مداح ... و مفيش قانون بــ يجرّم او حتي بــ يدّى الحق للدولة انها تراقب اتصال اي منظمة او حتي جمعية خيرية مصرية او تلقي تمويلات خارجية.
.
يعني السبوبة كدة انقطعت ..... ومش بس كده... لكن كمان تم ادراج 1538 اخوانيا على قوائم الارهاب ... منهم ناس قليلة جدا مشهورة ... و الباقي معظمهم مستخبيين خالص .... او نقدر نقول ... ان مصر بدأت بالفعل تفكك اكبر خلية تخريبية متغلغلة فى الداخل المصرى زي السرطان.
.
المهم و عشان مانطولش عليكم .... نيجي بقي لموضوع الكونجرس الامريكي و شغل الدولة العميقة الامريكية ضد مصر ... و الفيديو المشموم اللى النشطاء و الاخوان فرحانين بيه و عمالين يشيرّوه و هم ماسكين المناديل و بيعيطوا على حال مصر =D ..... طب ليه قلنا عليه مشموم ... لان ابطاله هم المنبع الرئيسي و القادة الحقيقيين لكل شمامين الكله اللى شوفناهم طوال السنين اللى فاتت
..
اللى حصل هو جزء صغير جدا من حرب تكسير العظام و فرض الارادات بين الدولة المصرية و قادة اهل الشر و من يديرون الحرب اللى شغاله على الارض في المنطقه اللى شغاله بقالها اكتر من 7 سنين ، و اللى الناس للأسف شافت جزء صغير منها في موضوع ريجيني و اللى اتكلمنا عليه في المقال اللى اللينك بتاعه في اخر المقال ده ... و اللى شايفينه دلوقتي في قصة تعطيل المعونة الاقتصادية ، اللى هي اصلا مش معونه اقتصادية و لكن تمويل صريح للجماعات التخريبية.
.
الدولة العميقة في امريكا بعد الخازوق اللى اخدوه بنجاح ترامب و خروج اوباما و هيلاري من قيادة اتخاذ القرار ... و كمان نجاح الدولة المصرية في فرض ارادتها في المنطقة و ايقاف و بداية هدم مخطط هدم المنطقة بالكامل بقيادة مصر ..... و مش بس كده ... بداية مصر في تفكيك ادواتهم اللى بيشتغلوا بيها على الارض في داخل مصر .... قامت الدولة العميقة هناك مظبّطة جلسة الاستماع اللى نظمها الكونجرس لمناقشة تطبيق تخفيض المعونات الاقتصادية الامريكية لدول العالم جميعاً .... و اللى هــ تقوم بتخفيضها بنسبة 29% ... فيقوموا حاطين مصر في الصوره في نفس البروجابندا اللى اتعملت قبل كده مع الطليان لما طلع قرار خايب للاستهلاك المحلي بوقف تصدير قطع غيار طائرات الاف 16
.
المساعدات العسكريه 1.3 مليار دولار زي ما هي و محدش قرب منها ... اما المساعدات الاقتصادية اللى اصلا مش بتوجه للمساعدات الاقتصاديه
... قالوا هــ نأجلها خالص عشان يا حرام حقوق الانسان و حقوق جمعيات المجتمع المدني اللى هما جواسيس اصلا و اللى الدولة بــ تضيّق على انشطتهم التخريبية و بتراقبهم .
فجابوا 3 معلمين كبار هم من قادوا جلسة الاستماع دي ... طب مين هم بقي اللى قعدوا يعيطوا على حقوق حرية الرأي و التعبير و حقوق الانسان !!!! .... خد عندك بقي عشان لما حد يشيرلك الفيديو تعرف ترد عليه
.
اول بطلة هي الحاجه "ميشيل دن " و دي حضرتك كبيره الباحثين في معهد كارينجي بتاع عمرو حمزاوي و اللى اتمنعت من دخول مصر اول لما تولي السيسي الحكم في 2014 و اللى اسست حركة "المصريون الجدد " لمناهضة اعادة ترشيح عبد الفتاح السيسي رئيسا مره اخرى ...... و اللى جوزها يبقي الحاج "تشارلز دن" اللى هو مدير برامج افريقيا و الشرق الاوسط لمنظمة فريدوم هاوس ... فاكرينها ؟؟؟؟
.
اما التاني فهو "توم ميلونيسكي" و ده كان مساعد هيلاري كلينتون لشئون نشر الديمقراطية و حقوق الانسان و هو الضيف الدائم في قنوات يتامي البنا الممولة من قطر و تركيا زي قنوات الجزيرة و العربي الجديد ... و يعتبر من اهم المدافعين عن الاخوان و دائما بيوصفهم انها جماعة مظلومة تسعي لاحترام حقوق الانسان و نشر الديمقراطيه باستخدام الاسلام الوسطي .
.
اما التالت فهو "إيلوت ابراهام" و هو يهدودي صهيوني و خبير في الامن القومي و يعتبر من اكبر اللاعبين و الداعمين للتنظيمات المسلحه المعتدلة الكيوت الجميله اللى موجوده في سوريا و ليبيا =D =D
.
يعني من الااخر كده مين يشهد للعروسه
... و دول مكانوش بيعملوا شغل المعلم لإبنه ... لا ... دول كانوا محروقين و بيحاربو لأخر نفس عشان يلحقوا شقي عمرهم و خط بارليف اللى بيتهد داخل القاهرة دلوقتي بهدوء و بطىء و بأقل الخسائر على المجتمع المصري ..... و برضوا اللى حصل هو محاولة ضرب اسفين بين ادارة ترامب ، والادارة المصرية بنفس طريقة الاسفين بتاع قرار التصويت بتاع مجلس الامن بتاع فلسطين و اللى مصر سحبته و اتقدم تاني و اتوافق عليه غصب عن عين أمريكا .. و مصر لعبت بيهم الكوره ساعتها .
و عشان تبقوا عارفين الفترة اللى جاية ممكن نسمع اخبار عبيطة الهدف منها حضرتك زي حقوق الانسان و الاختفاء القصري و علاقات مصر بكوريا و علاقتها بهتلر و موسيليني ... و ممكن توصل انهم يتهمونا بإن مصر هي اللى اكلت الجبنه
.
طب يعني ترامب حلو و جميل .... اقول لحضرتك السياسة مفيهاش حلو و وحش .... فوز ترامب هى هدنة مع قادة اهل الشر بعتهالنا ربنا لمدة اربع سنوات لغاية لما نقف علي رجلينا و نرسخ فرض إرادتنا في المنطقة ..... و نسيبهم مشغولين مع بعض و نستفاد من الموقف ... و بصراحه مصر بتلعب باحترافية و طالعة كسبانة من الجميع
.
معلش طولنا عليكم .... لكن ياريت راجعوا المقالات اللى موجوده تحت و اربطوا بينها و بين الاحداث الحالية
.
تحياتنا
المراجع
---------
ابو نص لسان بيقول هي كانت فين المخابرات و الجيش
http://www.kalamfelsamim.com/b/b1/
الحليف و الصديق و الشريك
http://www.kalamfelsamim.com/we/we35/
فض الاشتباك .. روسيا - تركيا - ايطاليا 3
http://www.kalamfelsamim.com/b/b19/
أخطر تنظيم سرى و انا عامله نفسي نايمه
http://www.kalamfelsamim.com/b/b20/
مصر و العوده للمربع صفر
http://www.kalamfelsamim.com/gc/gc8/
.
.
#تحيا_مصر
#لن_ينطفىء_نور_مصر
#تحيا_مصر_ماحدش_تانى
#الشعب_يدعم_الرئيس
#مصر_أم_الدنيا_وهتبقى_قد_الدنيا
#مصر_قلب_النظام_العالمى_الجديد
#كلام_في_الصميم
صفحة #كلام_فى_الصميم