حكايتنا هى

ازاى نبنى الانسان
عايزين نرجع الولد العتره اللى بيحب اهله وناسه
اللى بيحب بلده بجد مش كلام

عايزين نرجع البنت الى ان تكون بنت بجد وحقيق وليس بنت مسترجله
فيها الحياء والجمال
فيها الأدب والذوق

السادات قال ...." أخلاق القريه".....بعد اندثار الاخلاق نتيجه الانفتاح

مرسى قال "أهلى وعشيرتى ".....على خلفيه تعاليم البنا وسيد قطب

السيسى قال " خافوا على مصر يامصريين وخافوا على بعضكم وخليكوا ايد واحده و...."

وهى الكلمه التى تعبر عن جمال الماضى

هل جمال الماضى ممكن يرجع تانى كما وصفه فؤاد حداد فى كلماته المعبره التاليه ؟؟؟؟

==========
الجِيرة و العِشْرة



في كل حي ولد عترة و صبية حنان
و كلنا جيرة و عشرة و أهل و خلاّن
أميرة عاقلة و فى الحجلة العقل يطِير
كانت صغيرة بضفيرة كان هو صَغِير

ساعة ما تضحك مع اخوها تلاقيه بيغِير
ولَمَّا ترفع قُلّتْهَا تلاقيه عطشان
زمانه ماشى بخطوة يضم
زمانها كبرت و بقت أم
زمان جواب جاى لها بيجرى على العنوان

في كل حي ولد عترة و صبية حنان
و كلنا جيرة و عشرة و اهل و خلاّن
***
الفجر بيلاقي المغرب و بيجى و يِرُوُحْ
و الليل يرُد على الشارع شباك مفتوح
هنا الرصيف وهنا السلِّم وهناك يا سطوح
متعلقة كمام النونو فى ديل الفستان

زمَانُه ماشى بخطوة يضم
زمانها كبرت و بقت أم
زمان ضناهم فى المدرسة كنز الاوطان

في كل حي ولد عترة و صبية حنان
و كلنا جيرة و عشرة و اهل و خلاّن
***
نحضن ولادنا ولا نخلّى حنية و ذوق
نفرح معاهم و نغنى لقدّام و لفوق
يادي العيون اللي بتقرا في كتاب الشوق
الدنيا خضرا و مش فاضل على بكرة زمان

زمانه ماشى بخطوة يضم
زمانها كبرت و بقت أم
اصل الحكاية حكايتنا نبني الانسان

فى كل حى ولد عترة و صبية حنان
و كلنا جيرة و عشرة و اهل و خلاّن