ده المشروع إللي عايز أقدمه لمؤسسة الرئاسة وفيه تفاصيل كتيرة مذكرتهاش في البوست لحفظ حقوق فكرة المشروع ولتأمين المشروع نفسه من اي عبث أو فساد فيه
ياريت تعملوا شير يمكن صوتي يوصل للرئيس السيسي
التواصل بين المسئولين والمواطنين تعتبر أكبر مشكلة في اي دولة في العالم ...المواطن عنده شكوى عايز يقدمها لمسئول علشان يحلها ...مشكلة خاصة أحيانا وأحيانا مشكلة عامة تخص الدولة أو تخص منطقته أو الحي الذي يسكن فيه .
المسئول طبقا لمشاغله الكثير ممكن صوت المواطن أو شكوته توصله وممكن لا ...وأحيانا شكاوي المواطنين مش بتوصل للمسئول إما لتراكم وتزاحم الشكاوي أو لفساد المساعدين حول المسئول أو لتجاهل المسئول نفسه للشكاوي .
ومن أكبر المشاكل إللي بتواجه أكبر مسئول في الدولة وهو رئيس الجمهورية هي مصداقية عمل كل مسئول تحت منه...من رئيس الوزراء والوزراء ومديري المصالح الحكومية والمحافظين ورؤساء الأحياء ومديري القرى والمراكز وحتى عمدة القرية .
رئيس الجمهورية في الغالب بيعتمد على التقارير الخاصة بإنجاز كل مسئول قدامه وبيعتمد على صدق المسئول إللي تم أختياره بناء على كفائته وإنجازاته في موقعه السابق
طيب إزاي نحل المشكلتين دول؟؟
إزاي نضمن وصول صوت المواطنين للمسئولين المختصين بتلك الشكاوى فعليا ونضمن كمان حل المشاكل مش مجرد وصولها...وكمان نضمن لرئيس الجمهورية متابعة كل المسئولين في الدولة من رئيس الوزراء وحتى عمدة اصغر قرية في جمهورية مصر العربية ؟؟؟
هذا هو فكرة السيستم إللي سميته " شيخ الحارة الإليكتروني "
طيب هناخد مثال ونشوف السيستم فكرته ماشية إزاي وهتتنفذ إزاي
عندنا مواطن مثلا من إلمنيا – مركز مغاغة –قرية الشيخ زياد
المواطن اسمه محمد عبد العال الرقم القومي ليه
على سبيل المثال987979787682346
المواطن عنده مشكلة ....مش عارف يصرف معاشه التأميني علشان ورقه مخلص لتعنت موظفين أو مش موجودين أو واقفة على توقيع والموظف مش موجود
الموظف بعت مشكلته للجرايد وبرضه مفيش حل...أتصل بالمذيع الفلاني وعرض مشكلته وبرضه محدش مسئول كلمه يرد عليه
طيب الحل إيه للمواطن ده؟
إزاي نضمن شكوى المواطن ده توصل للمسئول المختص وفي نفس الوقت توصل لرئيس الجمهورية
وإزاي رئيس الجمهورية ورئيس الوزراء ومحافظ إلمنيا وعمدة قريته ورئيس الوحدة المحلية لمركز مغاغة ووزير التأمينات ورئيس الوزراء ومدير المصلحة الخاصة بصرف المعاش ونائب الدايرة الخاصة للمواطن ده يعرفوا مشكلته وشكوته؟
وليه لازم الشكوى توصل لكل من سبق ذكرهم..ما كفاية مسئول واحد بس وخلاص؟؟؟
وإزاي الموظف هيوصل لكل دول أصلا بعد ما فشل يوصل لاصغر مسئول عن طريق الإعلام؟؟
وإزاي رئيس الجمهورية هيتابع كل دول في عملهم؟؟
من هنا..هنبتدي نشرح السيستم
خريطة جمهورية مصر العربية مقسمة لمحافظات في التقسيم الإداري وكل محافظة إما تتقسم لأحياء أو مراكز(وحدة محلية ) وكل مركز ينقسم لقرى
تقريبا نفترض عدد الأحياء مع القرى على مستوى مصر كلها تصل 300
هنوزع على ال 300 قرية وحي جهاز كومبيوتر ..كل جهاز من دول هيكون موجود في مكتب خاص في القرية أو الحي كما أشرنا سابقا
نقول الجهاز تقريبا ب 1000 جنيه...يعني محتاجين حوالي 300 ألف جنيه
الجهاز ده هيكون متصل بشبكة داخلية (إنترانت) معزولة تماما عن شبكة الإنترنت العالمية أو اي شبكة أخرى ..الشبكة دي مرتبطة بسيستم موجود في وزارة الدفاع أو المخابرات أو رئاسة الجمهورية .
شبكة داخلية محدش يقدر يدخلها أو يوصلها من برة مصر
فقط من خلال المكاتب دي ممكن تتفتح والوصول إليها في أي وقت في ال 24 ساعة
المواطن هيروح المكتب إللي تابع للمنطقة إللي ساكن فيها وهيقدم شكوته
طيب سؤال؟
طيب ليه االمخابرات و الرئاسة و الدفاع عشان شكوى ؟؟
ليه مش الرقابة الإدارية و الوزير المختص و رئيس الوزراء ؟
الإجابة : لأن كل شكاوي المواطنين أمن قومي...تكون موجودة نسخ منها في أهم أجهزة في الدولة وغير مسموح لاي حد بالإطلاع عليها
لكن السيستم دلوقتي لسة دوره مجاش...من هنا هنبتدي نمشي على السيستم
المواطن إللي عنده شكوى ده هيروح قريته ...هيدخل المكتب إللي فيه جهاز كومبيوتر وشاب قاعد مهمته يدخل الشكاوي ويوصلها للمكان المناسب
هيقوله عندي شكوى
هيقوله أتفضل: لو سمحت رقمك القومي
هيمليه رقمه القومي
أول لما يمليه هيظهر ليه بيانات المواطن ده
هيقوله نوع شكوى حضرتك
من هنا بقى هيبتدي فكرة السيستم
============= =====
حضرتك شكوتك تختص إيه؟
عندي مشكلة يابني مش عارف اصرف المعاش ؟
تمام يا فندم...حضرتك كدة شكوتك تختص وزارة التأمينات ؟
لما ييجي يبعت الشكوى هيبعتها فين تحديدا؟؟
نص الشكوى كما يمليها المواطن ستصل للتالي ذكرهم
نسخة لرئيس الجمهورية
نسخة لرئيس الوزراء
نسخة لوزير التأمينات
نسخة لمدير المصلحة
نسخة للمحافظ
نسخة لمدير وحدة المحليات
نسخة لعمدة قريته
نسخة لنائب الدايرة
كل ده من خلال السيستم...تلقائي أي شكوى لاي مسئول مختص هتصل للجميع نفس الشكوى
الجميع سيصله نص الشكوى..
هنا يأتي سؤال...من المسئول الذي سيقوم بمتابعة المشكلة والرد عليها
يوجد في السيستم ما يسمى أولوية الوجوب للرد
يعني إيه؟
يعني أول حد يرد هو أصغر مسئول مباشر يختص بتلك المشكلة وهو مدير المصلحة
لو مردش وتجاهل المشكلة؟؟
الوزير يقوم بالرد ويعاقب المدير المختص
الوزير تأخر في الرد أو مردش
يبقى نائب الدايرة ورئيس الوحدة المحلية وعمدة القرية يتحركوا بالرد لحث المسئول المباشر ووزيره للرد على الشكوى وحلها
طيب كل ده مين هيشوفه؟؟
سواء رد المدير أو الوزير أو رئيس الوحدة المحلية أو عمدة القرية
الكل هيشوف كل حاجة ..من أول رئيس الجمهورية حتى اصغر مسئول
علشان كدة السيستم هيبقى مكشوف لكل المسئولين وكل مسئول يعرف إن مفيش حاجة مستخبية خلاص وكل حاجة مكشوفة حتى تأخره في الرد أو إنه يتجاهل الشكوى ده هيتعرف وهيوصل لأكبر مسئول
طيب سؤال مهم جداا
إزاي رئيس الجمهورية هيكون عنده وقت لمتابعة شكاوي وسلوك المسئولين ويتابع مشاكل الدولة الإدارية وكل فساد إداري في الدولة ويعرف مين بيشتغل ومين لا ؟؟
ده هيتم في اقل من دقيقة واحدة
إزاي؟؟
شاشة تعرض إحصائيات شاملة ...إحصائيات متغيرة على مدار الساعة...كل ثانية بيحصل شكوى جديدة أو رد من مسئول أو تأخر في الرد على شكوى أو حلها أو فساد إداري كشكوى من رشاوي أو تقصير مسئولين أو تعنت مسئول ..كل ده عبارة عن إحصائيات دقيقة جدا تعرض على شكل رسومات بيانية مثل شاشات البورصة العالمية ويمكن لرئيس الجمهورية بضغطة زر الدخول على تفاصيل اي عملية إحصائية
يعف أكتر مدير مصلحة بيشتغل..اكتر وزير مقصر في خدماته...رئيس حي فاسد..كل حاجة
طيب السيستم بيساعد في إيه كمان
مواطن عنده مشكلة صحية...بيدخل مسشفى والمستشفى رفضت تدخله علشان مش معاه فلوس...زي ما بيحصل في مستشفيات كتيرة
المواطن يدخل اي مستشفى ويتعالج طالما الإمكانيات متوفرة ويبقى المواطن ده ممنوع من السفر ومغادرة البلاد لحين سداد ما عليه من مستحقات لتلك المستشفى...واي شكوى من مستشفى ترفض علاج مواطن أو رعايته طبيا تصل للمسئول المباشر
طيب إيه فائدة المواطن إنه يدخل رقمه القومي عنده تسيله للشكوى؟؟
ده لمصداقية الشكوى وعلشان كدة لازم يكون فيه جزاءات وغرامات مادية على الشكاوي الكيدية وعقوبات...ميبقاش الموضوع مفتوح للشكاوي المتعددة
طيب المواطن بعت مشكلته...هيعرف منين إن مشكلته إتحلت؟؟
لما المواطن بيسجل مشكلته بيظهر بياناته عن طريق الرقم القومي
ويظهر فيها كل بياناته ومن ضمنها رقم الموبايل إن وجد...
برسالة قصيرة ستصله إن مشكلته وصلت وجاري حلها
لو مفيش رقم موبايل يبقى المواطن يمر على المكتب مباشرة وميروحش للمصلحة غير لإنجاز مشكلته إللي إتحلت وبكدة نضمن عدم تكدس مواطنين في المصالح الحكومية بغير داع والمواطن يشعر بالتواصل المباشر مع كل أجهزة الدولة ويشعر بالأمان أن صوته وشكوته ستصل لمكانها ولن تضيع مثلما كان يحدث من قبل
الإعلام دوره سينتهي...لن تجد واطن يقدم شكوته في الإعلام سواء كان كان مقروئا أو مسموعا أو مرئيا أو إليكترونيا
كله هيتم من خلال نظام عمل الفكرة ..فكرة شيخ الحارة الإليكتروني
طيب عدد الموظفين المطولبين للتواحد بالمكتب على مدار 24 ساعة؟؟
3 ورديات يوميا ...3 في 300 يعني محتاجين 900 شاب
كل شاب يقبض مرتبه إما من نفقات الميزانية التي تختص القرية أو الحي أو الوحدة المحلية وممكن يصل المرتب الخاص بالموظف الوحد ل 2000 جنيه شهريا ..يعني محتاجين 6000 جنيه شهريا
6000 جنيه في 300 يعني 18 مليون جنيه شهريا على مستوى الجمهورية...ممكن عن طريق ميزانية المحليات كما قلت وكل وحدة محلية لن تتجاوز 6000 جنيه أو من تبرعات ومساهمات المواطنين
--------------------------------------------
المشروع ده محسوب فيه حاجات كتيرة أوي زي ما قلتلكم وتفاصيل تانية كتيرة ومسئول عن تنفيذه مثلما ذكرت...محتاج فريق عمل معايا ودعم من الرئاسة وإن شاء الله يخلص في أقل من شهر والتنفيذ في اقل من شهر...يعني أقل من شهرين والدولة كلها تدار بالمشروع ده بأمر الله
عندي تخطيط شامل للمشروع وعارف مين بيروح فين وكل نقاط الضعف والثغرات معمول حسابها برضه...وكل الإحتمالات كمان معمول حسابها بأمر الله...ومستعد لكل الأسئلة على المشروع ده...ومكنتش حابب أكتبه عندي على صفحتي...بس بعد ما أستنفذت كل الطرق
https://www.facebook.com/3ALAM.SEMSEM/p ... 7968467629