صنع فى مصر

عمرو أبوشادى · **مرسل:** الأحد أكتوبر 23, 2016 11:32 pm

معنى الوعى الشعبى فى كلمتين .. !!
(صنع فى مصر) ..
ا====================
.
إستكمالاً لكلامنا عن حملة تخفيض الأسعار اللى بــ يقودها الإعلام المصرى .. واللى عاملة زى المخدر المؤقت اللى بــ يبيعهولنا ديلر مخدرات قذر .. واللى ينفع نستعمله ونستفيد منه لفترة ، لكن ماينفعش نتغافل عن أثاره السلبية ، و الأهداف الخفية للديلر ده مهما كان الإطار الجميل اللى هو بيتعامل معانا من خلاله وهو بيعطينا المخدر ملفوف فى ورقة سوليفان !!
.
فيه حملة منتشرة بقالها فترة هى حملة دعم المنتج المصرى تحت شعار "بكل فخر صنع فى مصر" .. والإقبال على المنتجات المصرية ترتب عليه إعادة تشغيل العديد من المصانع المصرية ، ورجوع أعداد كبيرة من العمال والموظفين لأعمالهم ووظائفهم .. ومش كدة وبس .. لكن إعادة إحياء المنتج المصرى ، وإنتاجه بجودة عالية ونشر فكرة "إدعم المنتج المصرى" قللت الطلب على المنتج المستورد ، واثرت على حجم الإستيراد ، واللى نتج عليه خفض عجز الموازنة بمقدار 63 مليار جنيه مصرى ، بعد إرتفاع حجم الصادرات بقيمة مليار دولار ، وخفض الواردات بقيمة 6 مليار دولار !!! ... طبعا مش ده السبب الوحيد لتقليل عجز الموازنه ، لكن كان له دور كبير فى كدة

.
الوعى أهم سلاح ممكن نواجه بيه الأزمة الإقتصادية اللى مصر بتعانى منها نتيجة حالة الحصار الإقتصادى وضرب السياحة وإنخفاض واردات العملة الصعبة .. والوعى ده جزء كبير منه هو مواجهة عوامل وأدوات المؤامرة داخلياً عن طريق دعم إقتصاد الدولة وأدواته الوطنية ، واللى يعتبر أهم سلاح فى مواجة المؤامرة الإقتصادية على مصر ... وعلى فكرة .. إوعوا تستهينوا بالموضوع ده ومدى تأثيره على أسعار السلع ، اللى بيحاول رجال الأعمال وأذرعهم الإعلامية ضربها وإفساد تأثيرها عن طريق حملة الشعب يأمر .... وللتدليل على كدة ، هــ نحكيلكم قصة قصيرة وحقيقية .. ذكرها الدكتور علاء حمودة فى أحد مقالاته من فترة طويلة ، بتوضح إن الوعى الجمعى للشعوب ممكن يهزم مخططات دول بكامل أجهزتها الأمنية والإقتصادية !!
.
فــ مع بداية الغزو التجاري الأمريكي لليابان.. نزلت اليابان مجموعة شركات عملاقة.. و بدأت تطلق منتجاتها في الأسواق.. بهدف ضرب المنتج الياباني.. و تسيّد السوق و السيطرة عليه تماما... و كان أسهل مثال للي حصل و بيستخدمه رجال الإقتصاد لحد اللحظة دي هو الشاي ...
.
شركة الشاي الأمريكية العملاقة إياها.. نزّلت في السوق الياباني شاي بنفس الجودة.. و بنصف سعر الشاي الياباني ... وطبعاً الشركة الأمريكية بتخسر ... بس تقدر تستحمل الخسارة سنة أو 2 أو حتى 5 سنوات .. لحد منتج الشاي الياباني ما يفلس .. وما يبقاش في غيرها.. وبناء عليه تفرض شركة الشاى إياها سعرها.. و محدش يقدر يقول لها لا.. لأنه خلاص مفيش منافس لها ...

.. ياترى مش هو ده اللى حصل فى مصر بعد الخصخصة وبيع الشركات المصرية وغلق المصانع وتدمير جودة المنتج المصرى وإجبار المواطن المصرى على نمط إستهالكى بنعانى منه لحد النهاردة !؟

.
المهم ..
مرّت سنة .. و الشركة الأمريكية ما بتبيعش باكو شاي واحد..!! ..
و مرت سنتين...
و نزل خبراء الشركة دي للشارع الياباني يجمعوا الآراء و يدرسوا و يحللوا ... و قابلتهم مفاجأة مزلزلة ... وهى إن رجل الشارع الياباني فضّل إنه يشتري الشاي الياباني الأغلى سعراً و الأقل جودة .. لسبب مش مفهوم ... !!
و مع أول استبيان اتضح السبب..

.
المواطن الياباني قرر إنه لو اشتري الشاي الأمريكي الأرخص بنصف الثمن.. فهو في الواقع بيدمر نفسه ببطء.. لأن مصانع الشاي اليابانية هــ تقفل .. ولما تقفل المصانع دي .. العمال اللي فيها تبقى بلا عمل .. و بالتالي ماتعرفش تسدد إيجاراتها للملاك .. و ماتعرفش تتعامل مع البقال و الحلاق و الخياط .. و بالتالي يفلس البقال و الخياط .. يحاولوا يبيعوا محلاتهم و مايعرفوش .. لأن الملاك مابتلمش إيجارات و ما معاهاش سيولة .. فيبدأوا يرفعوا الإيجار و الناس العاطلة ماتسددش و تبقى بلا مأوى .. و بالتالي مايسددوش قروضهم للبنوك و بالتالي البنوك ماتقدرش تدفع رواتب الموظفين العاملين بالدولة و ينطلقوا بلا عمل .. و مايقدروش يسددوا أي ضرائب و لا يتحملوا أي أعباء .. فتنهار المرافق .. و ... و تسقط اليابان...
.
يعنى زي لعبة شريط الدومينو اللي بترصه و تدفع أول قطعة منه .. و تتفرج علي الباقين بيوقعوا بعض .. أصغر واحد في السلسة لو وقع .. بــ بيجر معاه الشريط كله .. لحد الدولة نفسها ماتسقط ... و ده اللى أدركه المواطن الياباني العادي .. و بسبب الوعي ده.. فشلت الشركات الأمريكية اللي خدنا منها شركة الشاي كمثال.. في لعبتها ...

.
الشعب اليابانى قدم نموذج للوعى من أكثر من 70 سنة ، وبيتم تدريسه لحد النهاردة .. والشعب المصرى بيقدم النهاردة نموذج للوعى بدعمه للمنتج المصرى على حساب المنتج الأجنبى علشان يقلل الأعباء عن كاهله ، وكمان يخرج من أزمته الإقتصادية ، واللى جزء منها هو أزمة إقتصادية عالمية طاحنة ، بيحاول البعض تصويرها على إنها أزمة فى مصر فقط .. لكن الجزء الأكبر منها هو مؤامرة موجهة ، وللأسف بيشترك فيها كلاب الداخل من بعض .. أيوة بعض رجال الأعمال ، ومعهم أذرعتهم الإعلامية اللى كلنا عارفينهم .. وبدل ما كان النموذج فى اليابان ناس جايين من برة علشان يحطموا إقتصادها .. النهاردة عندنا فى مصر ناس جايين من جوة ، وكل هدفهم هو مكاسبهم الشخصية فقط وتحقيق اعلى عائد بمبدأ ، "فيها لأخفيها" ... ويوم ماتخرب وتقع ، كل واحد فيهم باسبوره جاهز ، وأماكن إقامته جاهزة برة مصر ، ورصيد من الأموال تكفل لكل واحد فيهم بــ أسرته معيشة مرتاحة إلى ما شاء الله ... زى بالضبط الأخ الإعلامى المشهور اللى زوجته الإعلامية راحت دفعت مصاريف دراسة إبنهم 30 ألف جنيه إسترلينى فى السنة .. وجاى يتكلم عن الغلابة ، ويسودها فى وش المصريين ويعيشنا هو وزوجته من خلال برامجهم ، فى حالة من الإحباط والسوداوية والطاقة السلبية !!!
.
حاجات كتيرة ممكن إحنا نشوفها صغيرة .. لكن تأثيراتها كبيرة جداً .. ومنها دعم المنتج الوطنى اللى تانى وتالت ورابع .. هــ يشغل المصانع ، ويخلق فرص عمل ، ويقلل الأسعار ، ويخلق منافس محلى للمنتج المستورد ، ويساهم فى زيادة حركة الدورة المالية الداخلية ، ويزود حجم الصادرات ، وبالتالى يقلل عجز الموازنة ، و يرفع واردات العملة الصعبة ، واللى هــ يزوّد الإحتياطى النقدى للدولة ، ويرفع قدرة البنك المركزى على مواجهة تحديات السوق السوداء والتلاعب بسوق العملة .. ألخ ألخ ألخ ... فــ علشان كدة ، إوعوا تستهترو بالحاجات الصغيرة
.
مصر قد تمرض ، ولكنها لن تموت .. وخليكم متأكدين إنه ماحدش هــ ينهض بمصر من كبوتها غير أبنائها ... يعنى لا دعم ولا مساعدات ولا غيره ... لأن اللى عمل نهضة مصر على مدى تاريخها هم المصريين .. واللى أنقذوا مصر من الإخوان هو إحنا .. واللى وقف وصمد أمام العالم كله برغم كل الضغوط هو إحنا .. واللى جمع مليارات علشان قناة السويس الجديدة هو إحنا ، واللى عمل مشروعات قومية وخلصها فى قفزة زمنية تفوق كل المعدلات العالمية هو إحنا .. واللى بيبنى العاصمة الإدارية الجديدة هو إحنا .. واللى بيبنى مفاعل نووى وبيحفر أنفاق وبيزرع 5.2 مليون فدان وبيحفر أنفاق وبيعمر سيناء وجبل الجلال هو إحنا المصريين .. مش حد تانى
.
وبإذن الله هــ نقوم بنشر بعض صور المنتجات المصرية فى بوست مستقل بإذن الله
.

#تحيا_مصر
#لن_ينطفىء_نور_مصر
#تحيا_مصر_ماحدش_تانى
#الشعب_يدعم_الرئيس
#مصر_أم_الدنيا_وهتبقى_قد_الدنيا
#مصر_قلب_النظام_العالمى_الجديد
صفحة #كلام_فى_الصميم

منقول من صفحة كلام فى الصميم

msobieh · **مرسل:** الأحد أكتوبر 23, 2016 11:37 pm