موقع د. محمود صبيح

عندي كلمة احب اقولها للمبتلين من امثالي وياريت لو الاحباب وقبلهم سيدنا ومولانا الدكتور محمود يصححوا لي

اوعى ياصاحبي تفتكر اننا بالتفكير الايجابي او التأمل لوحده هاننجح
احنا من غير سيدنا النبي يتامى مساكين
لازم ندخل الدائرة المحمدية ونركب السفينة النبوية علشان نعيش عيشة هنية ونموت موتة سوية ونرد مرد غير مخز ولا فاضح ان شاء الله
ازاي بقى نركب السفينة وندخل الدائرة
الدائرة المحمدية ثلاث مستويات
كل مستوى وليها علومها واعمالها
ولكل مستوى ثمرتها ونورها
المستوى الاول هو الاسلام
المستوى الثاني هو الايمان
المستوى الثالث هو الاحسان
بالنسبة للمستوى الاول (الاسلام) فنوره عظيم وثمرته التقوى وجماله خلاب
النطق بالشهادتين اساس وشرط للدخول لهذه الحضرة المباركة
يعني لازم نقول بقوة واعتقاد واقتناع
أشهد ان لا اله الا الله وأشهد أن سيدنا محمد رسول الله
مجرد النطق بهذه الكلمة الشريفة اصبحنا داخل الدائرة المحمدية وتحت العناية المحمدية الشريفة
وبقينا محسوبين على سيدنا النبي صلى الله عليه وسلم
وهاتبتدي اعمالنا تعرض على حضرته وقلوبنا يطلع عليها بنظره الشريف
وده اول الطريق
وهو اخر الطريق ايضا
المستوى الاول شهادة عقلية وفي الثاني شهادة قلبية وفي الثالث شهادة روحية وفي كل شهادة تكون الدائرة
اوعى الشيطان يضحك عليك ويقولك انك ممكن تدخل الدائرة بلا اله الا الله بس منغير محمد رسول الله
يبعتلك الشيخ الضلالي ولا العلامة الفلاني علشان يخدعك
لو انكرت او شككت او لم تنطق بمحمد رسول الله تطرد فورا من الدائرة
وتخرج برة العناية المحمدية
وتبقى شقي محروم
قال الامام الشافعي من قال لا اله الا الله بصوت مرتفع
محمد رسول الله بصوت منخفض لاتقبل شهادته
شوفت بقى
مجرد انخفاض الصوت يحرمك من نور الاسلام وبركته
مابالك بقى لو ماقلتش الكلمة
(لا اله الا الله) وحدها اسمها التهليل
(لا اله الا الله محمد رسول الله ) على بعضها اسمها كلمة التوحيد
لا اله الا الله سور الحصن
محمد رسول الله باب الحصن
ولاحول ولاقوة الا بالله مفتاح الباب
وعلشان تحتمي بالسور لازم تدخل من الباب
وعلشان تفتح الباب لازم الاستسلام الكامل والخضوع
ب( لاحول ولاقوة الا بالله )
والمفتاح في يد الفتاح
اشهد ان لا اله الا الله واشهد ان سيدنا محمد رسول الله
ثبتنا يارب بقولها وانفعنا يارب بفضلها واجعلنا من خيار اهلها