بمناسبة مولد سيدنا الحسين صلى الله عليه وسلم

النيل الخالد · **مرسل:** الأربعاء فبراير 18, 2015 7:18 pm

بمناسبة مولد سيدنا الحسين صلى الله عليه وسلم
كل عام وحضرتك بخير يا مولانا ولى أستفسار بعد إذن حضرتك
ما معنى محاسيب سيدنا الحسين صلى الله عليه وسلم ؟
هل هم أحباب سيدنا الحسين ؟
هل هم خدام مسجد سيدنا الحسين ؟
أم ماذا تعنى المحاسيب إن كانوا غير هذه المعانى ،
وجزاكم الله خيرا يا سيدنا

سلافة الروح · **مرسل:** الأربعاء مارس 18, 2015 2:34 am

النيل الخالد
وحشنا كلامك الجميل واسئلتك المفيدة
بعد طول غيابى عن المنتدى بحثت عن موضوع عن مولد سيدنا الحسين
وذلك حتى اكتب تجربتى كل سنة فى يوم مولد سيدنا الحسين
واول موضوع قابلنى هو بمناسبة مولد سيدنا الحسين
تعودت ان اذهب للمسجد فى هذا اليوم وازور مولانا
وكنت اعلم ان المولد الحسينى امس ولم استطع الذهاب فى هذا اليوم
لظروف والدتى المريضة كنت لا استطيع مغادرة البيت وحزنت جدا
وفى اليوم التالى جاءت خالتى لزيارة والدتى وشوية وخالى جاء برضه للزيارة
وكانت تعبانة جدا قلت لنفسى انا حعمل تحليل دلوقتى وكانت الساعة 11 ليلا
قلت لخالتى خليكى مع ماما وحنزل اروح للدكتور واجى تانى اوعى تسيبيها

انا فى غمرة والدكتور فى المعادى ومفيش معمل فاتح
اوقف تاكسى فين يا حاجة الدراسة
بعد ماركبت قلت لنفسى دراسة ايه وانا نازلة دلوقتى ليه
السواق قالى خلاص كده العربيات بترجع علشان النهاردة مولد الحسين
فرحت وقلت لنفسى انا حسبت غلط
السواق نزلنى فى اول الدراسة
ارجع تانى عشان ماما الساعة متاخرة
طيب ازور سيدنا الحسين
لا بقى انتى اتجننتى دلوقتى دى الدنيا زاحمة اعمل ايه
امشى شوية وارجع يارب ايه الجمال ده النهاردة المولد ومش امبارح
الشارع طويل زحمة
ياسيدنا الحسين مدد لو عاوزنى ازور حضرتك يسرلى الطريق
اعدى الرصيف التانى وامشى لغاية اخر الدراسة وارجع
ايه الناس الحلوة دى جايين من اخر الدنيا عشان مولد مولانا
واحنا جنبه وبنقول الدنيا زحمة
لا بقى انا معنديش دم ايه يعنى حتى لو رحت لغاية الجامع
وكفاية انى انظر للمأذنة واقول كل سنة وحضرتك طيب يا مولانا
مشيت فى وسط العربات فى ش الازهر لان الرصيف زحمة والعربات ارحم
كل الناس دى اللهم صلى على الحبيب
وصلت الساحة زحمة
يا مولانا إذن بالزيارة انا متعودة كل سنة ممكن
طولت عليكى يا نيلى الخالد
لفيت من وامام المسجد الى ان وصلت بالب مولانا
كتلة من الناس داخلة المسجد
وسع يا بنى انت وهو لستنا زينب ده واحد بيقول كده
وانا الست الوحيدة اللى داخلة المسجد ولم يوقفنى احد
وعلى باب المقصورة
مولانا انا جيت لغاية هنا ممكن ادخل
ستنا المشيرة العظيمة وسع
قلت ممكن ادخل وسعوا لى
اثنين امام المقصوره واقفين ساندين على الحائط تعالى هنا مكانى عشان الزحمة
سبتهم وقلت للى واقفين حول المقصورة ممكن توسعوا اقرأ الفاتحة وأمشى
حاضر ووقفت امام سيدنا الحسين ولا املك الا البكاء واقوله
متشكرين يا سيدنا الحسين متشكرين قوى قوى
ماما يا سيدنا الحسين مريضة
وانا وحدى قولى اعمل ايه
لفيت المقصورة والناس توسع لى
واحد يقولى انتى جيتى هنا ازاى
جيت باذن وانت مالك
وكمان زرت باب النبى
المهم خرجت والادهش التيسير اللى رجعت بيه
اعدى الصف التانى واجد تاكسى وارجع الاقى ماما احسن
وخالتى وخالى قالولى رحتى للدكتور
لم اكذب قلت اه رحت للدكتور

المهم يا نيل الخالد
لم انس ان اتذكر دكتور محمود صبيح
لان او لقاء بحضرته كان يوم مولد سيدنا الحسين
وطول ما انا راجعة وانا بقول
شكر يا سيدنا الحسين متشكرين يا سيدنا الحسين
وبس خلاص بحبكم بجد

النيل الخالد · **مرسل:** الأربعاء مارس 18, 2015 7:11 am

الله الله
والله انتى اللى وحشتينا يا حجة سلافة ووحشنا كلامك الجميل ،
وصدقت لما قلتى سألونى رحتى للدكتور قلتلهم نعم أنا مكذبتش ،
سيدنا الحسين هو طبيب ومداوى كل مريض ،
يا جمال سيدنا الحسين ....يا جمال سيدنا الحسين ،
ربنا يبارك فيكى ويزيدك من فضله ،
والحمدلله على شفاء والدتك ،ربنا لا يريكى فيها مكروه ابدا ، ويشفيها ويعافيها ، ويخليهالك......
وكل سنة وهية بالف خير بمناسبة عيد الأم .......
نورتى يا حجة سلافة وعودا حميدا إنشألله
ويا مدد وألف مددددددد يا سيدنا الحسين.

حامد الديب · **مرسل:** الأربعاء مارس 18, 2015 7:30 am

عود حميد يا حاجه سلافه واتم الله شفاء الفاضله والدتك ومرضى المسلمين

خلف الظلال · **مرسل:** الأربعاء مارس 18, 2015 9:20 am

اللهم صل على سيدنا ومولانا محمد وعلى آله وصحبه وسلم

السيدة النيل الخالد والحاجة سلافة ودكتور حامد الديب
دمتم ودامت محبة ومدد سادتنا آل البيت لكم ودامت محبتكم لسادتنا آل البيت
ومدد يا سيدنا الحسين وكل سنة وحضرتك طيب

فكرتني محبة السيدة سلافة بكلام ماما وهي بتحكي لي عن مولد السيدة زينب زمان أيام طفولتها
وازاي الزائرين بيقفوا بالشموع ويمدحوا ويقولوا لستنا زينب صباحية مباركة يا ست في يوم المولد ويزينوا المقام كالعروس
حب يعبر عنه الناس كل بطريقته وذوقه

الحمد لله رب العالمين على نعمة حضرة سيدنا النبي وسادتنا آل البيت

النيل الخالد · **مرسل:** الأربعاء مارس 18, 2015 9:59 am

جزاكم الله خيرا اخوتي واخواتي الافاضل
وزادكم الله حبا في رسول الله صلي الله عليه وسلم وآل بيته اللهم آمين

سبيل الرسول · **مرسل:** الأربعاء مارس 18, 2015 1:43 pm

بارك الله فيك يا حاجة سلافة و البس اهلك ثوبة الصحة و العافية

و الله انت من فاكهة الشفاء فى الموقع المبارك

اللهم متعنا بك ، امين

موقع د. محمود صبيح

بمناسبة مولد سيدنا الحسين صلى الله عليه وسلم

الموجودون الآن