خطر كوريا الشمالية علي الاقتصاد العالمي واحتمالات الابادة الجماعية
.
وانا بتابع أزمة كوريا الشمالية الايام اللي فاتت توقعت حاجة بديهية جدا ان كل الأسواق الآسيوية تتهز وتخسر ويحصل ارتجاج في كل القطاعات زي اي أزمة سابقة
إذا كان تفجير الكنيستين في مصر أبريل الماضي اثر سلبيا على بورصات اسيا
يبقة التهديد بحرب نووية في شبه الجزيرة الكورية هيعمل ايه!
المهم فضلت مستني يوم واتنين وتلاتة ومفيش اي تأثر ولا رد فعل
.
وفضلت مش قادر افهم ايه سبب الهدوء دة , لحد ما خرج مولانا "مارك موبيوس" رئيس مجلس إدارة شركة تمبلتون أهم المستثمرين في الأسواق الناشئة - من أكبر الداعمين للتجربة المصرية ونجاح الإصلاحات وتعافي اقتصادنا وفرصنا الهائلة في المستقبل - وقال سبب عدم تأثر الأسواق والاقتصادات باللي بيحصل :
"there’s nothing you can do about it -- if something breaks out, we’re all finished anyway.”
الترجمة : مفيش حاجة تقدر تعملها لأن الأمور لو اشتعلت كلنا هننتهي في كل الأحوال
هو يقصد أن لو الأمور تصاعدت ممكن توصل لإبادة
ودة هيكون شئ مستحيل حسابه أو تقييم نتايجه وتاثيراته على الأسواق بسبب فداحة وكارثية الوضع ساعتها ودة سبب سكون وهدوء الأسواق
الصراحة حاجة كوميدية جدا بس علمية جدا في نفس الوقت
هنحسب ازاي تأثيرات إبادة وحرب نووية على الاقتصاد !
وهو اصلا مش هيبقة فيه اقتصاد ولا دولة مع أول رصاصة
.
خلينا نشوف شوية ارقام عن الموضوع دة نفهم منها اكتر تعقيداته وتفاصيله ...
1 - التجارة الخارجية
- كوريا الشمالية بتستورد سنويا ب3.4 مليار $ وبتصدر ب2.8 مليار $
- اهم الدول اللى بتتعامل مع كوريا الشمالية تجارياً :
الصين بتبيع لهم 85% من وارداتهم وبتشتري منهم 83% من صادراتهم
تليها الهند وروسيا
ثم تايلاند والفلبين والمكسيك
ثم باكستان وبوركينافاسو
** عشان محدش يستغرب هما بيشتروا ايه من بوركينا فاسو
بيستوردوا منهم بذور زيتية
.
2 - اول استطلاع
مؤسسة امريكية متخصصة فى استطلاعات الراي والاحصائيات اسمها "YouGov"
عملت استطلاع عن : مين هم الاعداء من وجهة نظر الشعب الامريكي ؟
57% من الامريكيين شايفين ان كوريا الشمالية هى العدو الاول والاخطر لهم
ثم ايران وسوريا والعراق وافغانستان !
ثم روسيا وليبيا والصومال
ثم باكستان وفلسطين والسعودية واليمن
.
3 - مدي الصواريخ الكورية جغرافياً
دة مهم عشان نعرف نتخيل حجم الكارثة هتوصل لفين ؟
مدي الصواريخ الكورية الشمالية يقدر يوصل لمناطق فى 6 دول بخلاف الجارة الجنوبية طبعا
هما : امريكا - روسيا - الصين - استراليا - الهند - اليابان
.
4 - الاستطلاع الثاني والاخير
فى استطلاع تاني اخدوا راي الامريكيين عن ايه وجهة نظرهم طريقة التعامل الامثل مع كوريا الشمالية ؟
76% طالبوا بتشديد العقوبات الاقتصادية علي كوريا الشمالية
68% طالبوا بتشديد العقوبات علي الشركات الصينية اللى بتتعامل مع كوريا الشمالية
40% طالبوا بقصف المواقع النووية الكورية الشمالية باستخدام القوات الجوية الامريكية
28% طالبوا بتدمير المواقع النووية الكورية الشمالية بارسال قوات برية امريكية الي هناك
.
**ملحوظة : الاستطلاع قائم علي امكانية اختيار اكتر من اجابة فى السؤال الواحد عشان كدة النسب مش بتقفل ال100%
يعني ممكن اختار اننا نشدد العقوبات الاقتصادية علي كوريا والشمالية وفى نفس الوقت اختار اننا بردو نشدد العقوبات علي الشركات الصينية اللى بتتعامل مع كوريا الشمالية
.
https://www.facebook.com/Negm30