موقع د. محمود صبيح

The life of pi او حياة باي فيلم طويل بس قوي
الفيلم بيحكي عن قصة هندي ابوه صاحب حديقة حيوان وبياكل اللحوم وامه نباتية وهو نباتي واخوه زي والده

اول مشكلة بتقابل باي في الحياة اسمه فابوه سماه بيسين وزمايله بيضحكوا عليه
الاول كان بيحزن من اسمه ويكتئب وبعدين بدأ يواجه ويشرح اسمه بفلسفة مختلفة يخلي اللي حواليه يحترموه واختار لنفسه لقب باي
الولد من صغره بيحاول يعرف سر القدر والحكمة من اللي بيحصل في الحياة وبيسأل هو ليه ربنا خلقنا؟؟؟؟
هو محتاجنا في ايه؟؟؟؟
بدأ رحلة البحث في الهندوسية وبدأ يسمع لأمه قصة الاله كوشيرنا وفكرة الخلاص والفداء وبعدين دخل اليهودية وشاف قصة المختاريين وبعد كدة دخل المسيحية واعتقد بقصة الفداء والخلاص واخيرا دخل الاسلام وآمن بالله الرحمن الرحيم
الولد كان بيمارس طقوس الديانات الاربعة(وحدة الاديان)
الولد واخوه وامه وابوه بياكله
ابوه بيقوله ايمانك بكل شيء هايوصلك بعدم الايمان بأي شيء
لازم تختار دين واحد وتلزمه حتى ولو كان على غير مااعتقد(الدين الواحد)
الولد فكر شوية وقال هاختار التعميد (يقصد المسيحية)
الولد مازال عايش فكرة الدين الموحد ومش قادر يقتنع بفكرة الدين الواحد
بعدها حاول الولد انه يقرب من نمر عندهم ويأكله بإيده ابوه لحقه وعنفه
الولد بيقوله ان النمر كان وديع
الاب قاله انت شايفه بعينك
مشاعرك الصافية انعكست على عينيه فاعتقد انه وديع
علشان تفهم الحياة لازم تشوفها بعين الحياة مش بعينك
وعمل تجربة حية قصادة وجاب جدي ووضعه امام النمر والولد شاف النمر بدون ادنى تردد قتل الجدي واكله
وده كان اول درس
المهم الولد حاسس بفراغ روحي ونفسي لحد لما قابل بنت حبها وارتبط بيها

ابوه قرر السفر لكندا وهايخد حيواناته معاه لكندا
الولد اعترض وزعل وكان دايما بيسأل نفسه عن سر المعاناة وليه يعيش تجربة الفراق عن حبيبته

ولكن الظرف اقوى منه وماكانش عنده قرار
الولد سافر مع أهله
امه في السفينة طلبت اكل نباتي من الطباخ
الطباخ كلمها وحش وابوه اتخانق معاه
بعد الخناقة جالهم واحد ياباني اسمه البوذي السعيد وجابلهم رز وصلصلة
بعد كام يوم قامت عاصفة والسفينة غرقت
واهل الولد غرقوا
الولد نجا بقارب ومعاه ضبع وحمار وحشي رجله مكسورة وبعد شوية ظهرت انثى قرد انقذها وفجأة ظهر معاه ضبع بيحاول يهاجمه
بعد شوية الضبع هاجم الحمار الوحشي
وحاول يهاجم على الشاب بس القردة ضربت الضبع فقام الضبع قتلها فجأة ظهر النمر وقتل الضبع
وفضل الولد عايش مع النمر اكتر من ٢٠٠ يوم
حول انه يروض النمر وفشل وكان وقتها بياكل بسكوت كان معاه ومية
وبعد كدة لما فقد طعامه قرر ياكل سمك ويتخلى عن كونه نباتي
وقتها بقى ياكل زي النمر ويتعامل زيه
وقتها قدر يروضه لانه بدأ يتعامل زيه
بعد فترة نزل جزيرة معزولة فضل فيها كام يوم وبعدها ركب مركبته وفي الاخر وصل لجزيرة مأهولة بالسكان
النمر اتوجه للأدغال ومابصش وراه واختفى والولد تم انقاذه

لما بدأوا يحققوا معاه باعتباره الناجي الوحيد الولد حكى قصته الاولى ولكنهم تشككوا في صحة القصة
فحكى قصة تانية انه حصل انفجار والسفينة غرقت ونجا هو وامه والبوذي السعيد وكانوا في مركبة واحدة
البوذي السعيد رجله اتكسرت والطباخ قتله لانه عبء عليهم امه ضربت الطباخ فالطباخ قتلها فالولد قتل الطباخ
الولد قال ان الطباخ خرجوا اسوء مافيه
اللي بيسمع القصة قال ان البوذي السعيد هو الحمار الوحشي
والقردة هي امه والطباخ هو الضبع والنمر هو الشاب الهندي

الشاب الهندي قال للي بيسمعه عندك قصتين نهايتهم اني فقدت كل اللي بحبهم
انت تختار انهي واحدة
اللي بيسمعه اختار القصة الاولى
فالشاب الهندي شكره وعرفه على زوجته واولاده

طول القصة باي بيسأل نفسه عن سر القدر وحكمة المعاناة
باي آمن ان الله الرب القدير الرحمن الرحيم كوشيرنا كان معاه في كل لحظة
بس السؤال اللي مالوش اجابة ايه الحكمة من الم ومعاناة البوذي السعيد
الفيلم بيحكي قصة الانسان وصراعه مع نفسه ومحاولة ترويضها
والصراع بين الدين الواحد والدين الموحد
في النهاية عند المؤلف اللي بيغرق ويموت صاحب الدين الواحد واللي بينجو صاحب الدين الموحد